576/2023-2024

Aizawl, 25th May 2023: Vawiin khan Bawngkawn Chhim Veng YMA Hall-ah Sericulture Department chuan North Eastern Region Textile Promotion Scheme (NERTPS) hnuaia project 3 - Intensive Sericulture Development Project (ISDP), Integrated Bivoltine Sericulture Development Project (IBSDP), Integrated Muga Silk Development Project (IMSDP) te kharna hun ‘Closing Workshop under NERTPS’ an hmang a. Sericulture Minister Er.Lalrinawma chu khuallian niin, NERTPS hnuaia hmalakna hrang hrang te tarlanna ‘Closure Document under NERTPS’ chu a tlangzarh nghal a, Project thar - Eri Development Project, Silk Samagra-2 chu a hawng nghal bawk.

Er. Lalrinawma chuan Silk tihhmasawnna scheme-te chu sawrkar laipui ngaihpawimawh scheme an nih thu a sawi a. India ramah silk hmanna leh mamawhna a san thu sawiin Minister chuan silk tharchhuah kawnga intodelh chu ram economy siam nana thil pawimawh tak a ni, a ti a. Silk tharchhuahna (production) chuan mi tam tak tan eizawnna tha zawk a siam sak mek thu leh hmeichhiate dinhmun chawikan kawngah pawh a tangkai thu Er. Lalrinawma chuan a sawi bawk.

Khawvel sik leh sa inthlak danglam zelah Mizoram boruak pawh silk, a bikin Muga plantation neihna hmuntha takah a lo inher rem ta tih Minister chuan he hunah hian a tarlang a. Mizoramin ram leilung tha tak a neih chu hmang tangkaia, silk chin uar zel turin kalkhawmte chu a sawm a. Leilung nena inzawmna nei eizawnna a nih angin leilung duat thiam a pawimawh tih hre reng turin a chah bawk.

He hunah hian Dr. V.K. Rahmatulla, Central Silk Board, Seed & North East Cell-a Scientist ‘D’ chuan NERTPS chungchang sawizauna hun a hmang a. Sericulture Scientist, Dr. Lalthlamuana Pachuau pawhin ‘Impact of NERTPS in Sericulture Industry of Mizoram’ tih thupui hmangin thu a sawi bawk.

North Eastern Region Textile Promotion Scheme hi kum 2014 atang khan bultan niin, a hnuaiah hian project hrang hrang ISDP, IBSDP, IMSDP bakah Aspirational District Mamit chawikan nan ‘Development of Eri-Culture in Mizoram for the upliftment of Aspirational District’ te a awm a. NERTPS hian kum 6 chhung awhin, kum 2020 thleng khan kalpui a ni. Scheme kaltlang hian silk hmasawnna ruhrel hrang hrang din a ni a, ramchhunga silk tharchhuah a tihpun bakah chhungkaw inziaklut 2100 atanga chhungkaw 521 te chu Poverty Line chunglamah khai chhuah an ni bawk.

Workshop hi Pu C. Lalrosanga, Sericulture Department Secretary-in a kaihruai a. Central Silk Board, Bangalore leh Guwahati atangin Dr. K.M. Vijaya Kumari, Director, CMER & TI, Scientist rual - Dr. B.N. Choudhury, Dr. V.K. Rahmatulla, Dr. Aftab Ahmad Shabnam, J.C Deka, Joint Secretary (Tech) leh Manoj TS, Assistant Secretary (Tech) ten Workshop hi an lo hmanpui a, thupui hrang hrang hmangin inzirtirna hun an hmang a ni.

Vawiinah hian Silk farmer mi 18 te hnenah chawimawina (award) hlan a ni a. Chawimawina dawngtute chu:

1. Best Muga Farmer: Pu Lalthanzara, Lunglei.

2. Innovative Success Farmer in recognition of CSB: Pi Vanlalzawmi, Biate (Khawzawl District) leh Pu Lalruatkima, Saitual.

3. Best Emerging Silk Enterpreneur: Bombyx Choice by Esther Lalrinkimi, Bawngkawn.

4. Best Co-operating NGO: Open Doors by Makimi, Ramhlun.

5. Best Silk Enterpreneur: Zozia Silk by Pi Laltanpuii.

Integrated Silk Development Project (ISDP) hnuaia award dawngtute chu:

1. Pu F. Ronghaka, Tawipui North II, Lunglei District.

2. Pu F. Zakhuma, Chhingchhip, Serchhip District.

3. Pi Rohmingthangi, Sertlangpui, Lunglei District.

Integrated Bivoltine Sericulture Development Project (IBSDP) hnuaia award dawngtute chu:

1. Pi Lalhlimpuii, Hmunhmeltha, Champhai District.

2. Pi Zoramthari, Bethel Veng, Champhai, Champhai District.

3. Pi C. Lalsangzuali, Dungtlang, Champhai District.

Integrated Muga Silk Development Project (IMSDP) hnuaia award dawngtute chu:

1. Pu K.B. Sangkhuma, Rabung, Khawzawl District.

2. Pu Lalthlamuana, Thingdawl Chhim Veng, Kolasib District.

3. Pu Valbuanga, Vairengte, Kolasib District.

Development of Eri-Culture in Mizoram for the Upliftment of Aspirational District (Mamit) hnuaia award dawngtute chu:

1. Pi Lalsiami, Mamit Hmar Veng, Mamit District.

2. Pi Saikhuma, Bawngthah, Mamit District.

3. Pu Lalventluanga, Bawngthah, Mamit District te an ni.