577/2023-2024

2023 Ṭomir thla ni 25: Vawiin khan 11th Chakma Autonomous District Council (CADC) Inthlanpui, 2023 neih zawh taka 1-Borapansury MDC Constituency aṭanga thlan tlin, Pu Rasik Mohan Chakma chu Chawngtea CADC Art & Culture Hall-ah Mizoram Governor ai awhin Lawngtlai Additional Deputy Commissioner Pu Abraham Beirazi Khithie chuan CADC Chief Executive Member (CEM) atan rinawmna thu tiamtirin a la lut.

CEM thar lak luh inkhawm hi CADC-a Executive Secretary Pu Pronit Bikash Chakma chuan kaihruaiin, CADC (Constitution, Conduct of Business, etc.) Rules, 2002 rule 22 sub-rule (2) & (3) tlawh chhana CEM atana Pu Rasik Mohan Chakma ruatna sawrkar notification No. A. 43016/3/2023-DC&MA(C) Dt. 22nd May, 2023 chu a chhiar chhuak a. Hemi hnu hian Lawngtlai Additional DC chuan CEM hi a la lut nghal a. CEM thar Pu Rasik Mohan Chakma chuan thu a sawi bawk.

CADC Inthlanpui, 2023 neih zawh takah MDC bial 20 awm zingah Mizo National Front (MNF) party chuan seat 10 lain, a hnua party dang aṭanga lut nen MDC 15 an nei a. MNF Legislature Party dina sawrkarna siamin, May ni 23 (Thawhlehni) khan CADC-a MDC tharte lak luhna hun buatsaih a lo ni tawh a. Vawiin khan CEM lak luhna hun buatsaih a ni ve leh ta a ni.

Vawiina CADC CEM atana lak luh thar Pu Rasik Mohan Chakma chuan CADC-ah rin tlak leh lang tlang sawrkar kalpui a nih theih nan hma lak a tum thu a sawi a. CADC sawrkar ngelnghet tak a awm theih nan te, mi harsa zawkte dawm kan kawngah te, zirna ṭha a awm theih nan te theih tawp an chhuah dawn tih a sawi bawk.

CADC CEM atan lak luh thar Pu Rasik Mohan Chakma hian vawiin khan a pisa a luah lut nghal a ni.

Pu Rasik Mohan Chakma hi CADC-ah MDC atana term 6 thlan tlin a nihna a ni a. CEM nihna hi ṭum 5 chelh tawhin, nihna pawimawh tak tak dang pawh a chelh tawh a. Kum 2003 MLA Inthlanpuiah khan Tuichawng bial aṭangin MLA atan thlan a lo ni tawh bawk.