2687/2024-2025

Aizawl 25th October, 2024 : Pu Lalthansanga, Sericulture Minister chuan vawiin chawhma dar 11 khan Silk Samagra - II hnuaia Eri Cut Cocoon (Pangang inzial) thar chhuah Metric Ton 2, State pawna thawn chhuah tur chu Directorate of Sericulture, Chaltlang, Aizawl atangin a vailiam. 

Minister chuan State pawna thawn chhuah tur Eri Cocoon thahnem tak kan ram ngeiah thar chhuah a ni chu lawmawm a tih thu sawiin kan pi leh pute hunlai atanga kan lo neih thin dan (Jhum Cultivation) atanga lo neih dan nghet (Permanent Farming System) kan kalpui chhoh zel a ngaih thu a sawi a. Kan eizawnna avangin kan ramngawte nasa takin kan tichereu thin a, lo neih dan ngheta kan nei chho anih erawh chuan kan ramngawte kan humhalh thei dawn a ni a ti. Vawk leh Ar vulh lamah chauh insawrbing lova, eizawnna awlsam zawk leh hralhna awlsam zawk Pangang khawi lamah mipuite tan la thar turin a chah bawk a ni. 

Pu V. Zothansanga, Sericulture Department Director chuan Eri-Cocoon flag off theih an nei chu lawmawm a tih thu sawiin kuthnathawktute, a bik takin Cocoon khawitute chu Sawrkarin a ngaihtuah em em a, an pangngang khawite chu man man zawka an hralh chhuah theih nan theihtawpin hma a la mek a, Sericulture Department pawhin hlawk zawka Cocoon hralh anih theih nan hma an lak mek thu a sawi bawk. 

Vawiina Eri Cut Cocoon Sericulture Minister-in a vailiam tak hi a hrin laiin Metric Ton 11 a ni a. A chhunga buhchium (Pupa) tel lova hralh tur a nih avangin buhchium lak chhuah vek a nih hnu-ah Metric ton 2 vel niin Barpeta Marketing Jahur Uddin, Barbeta District, Assam chuan a lei a. A leitu hi Silk Entrepreneur niin Kum 10 chuang NE a Cocoon thar te leikhawmin Assam leh West Bengal a Silk Spinner hrang hrangte a Supply chhawng veleh thin a ni. Kg 1 hi ₹700/- zela hralh niin an lak chhuah tak a buhchium Metric Ton 9 pawh Mizoram chhungah ₹300-400 -in hralh vek a ni bawk. Kumin June thla khan Sericulture Farmer-te thar chhuah 1000 Kg vel Department-in a lo thawn chhuahsak tawh bawk a ni. 

Eri Cut Cocoon thar chhuahte hi Department leh "Silk Cocoon Processing and Marketing Industry Private Limited" tangdunin State pawn Buyer te hnena hralhna kawngah an thawk dun mek a ni.