1561/2023-2024

Aizawl, the 18th August, 2023: Sericulture Department hnuaia Muga Pangang (Muga Silkworm) chi siamna hmunpui, Government Muga Grainage Centre, Durtlanga hmalaknate vawiin chawhma khan Sericulture Minister Er. Lalrinawma chuan a hmunah tlawhin a enfiah.

He hun puala inkhawm tawi buatsaih Sericulture Director Pu V.Zothansanga kaihhruaiah Sericulture Minister Er. Lalrinawma chuan thu sawiin, Sericulture Department hnuaia hmasawnna hrang hrang hmuh tur a awm leh District thar pisa-te hawnfel a ni chu lawmawm a tih thu sawiin, Department hlun leh ngelnghet tak a nih anga hmunhma tha leh belhchian dawl hmalakna a awm chho zel chuan hmabak eng tak a nei tih a lantir a ni, a ti a. Sericulture kaltlanga thil dehchhuahte chu a hralhna kawnga buaina awm lo a nih bakah kan ram sik leh sa mil zawng tak a nih thu sawiin, tam zawk thar chhuak thei turin pangang khawitu kan pun zel a ngai a, a thatna vawrhlar leh inzirtir kawngah tan kan lak deuh deuh a tul a ni, a ti bawk.

Er. Lalrinawma chuan pangang khawitute tana ram tha leh sik leh sa nuam tak Pathianin min pekte chhawr tangkai thiam a tul thu sawiin, Muga pangang khawi hmanga eizawnna hlawhtling taka kalpui turin Mizoramin theihna nasa tak a neih thu leh State dangte ngaihven a a nih tawh thu a sawi a. Department hnuaia thawktute chu pangang khawitute chawikan leh puih kawnga tan la zel turin a fuih a; thawhhona tha tak an neih mek chu chhawmnung zel turin a chah bawk a. Kalphung pangai mai ni lo, hmasawnna rahbi thar, awlsam leh hlawk zawka pangang khawi dan leh ram sum leh pai dehchhuah tipung thei tur din tura ngaihtuahna sen tlanpuiah Department thawktute a sawm nghal bawk.

Thusawitu dang Sericulture Secretary Pu C.Lalrosanga chuan tunhnaia Sericulture hmasawnna tam tak hmuh a ni chu phurawm a tih thu leh farmer tam zawk an awm belh ngei a beisei thu a sawi a. Mamawh leh tul angte Department bakah Department dangte nena thawhhona (convergence) kaltlanga kalpui theih dan dap zel a tul thu a sawi bawk.

He hunah hian Dr. Lalthlamuana Pachuau, Sericulture Scientist-in Mizorama Muga pangang khawi dan chanchin tlangpui a sawifiah a. Sawrkar laipui a phur thu sawiin, muga pangang chi pawh an rawn ngen anga thawn a nih thu a sawi a. Eizawnna atana tlak leh farmer-te khaichhuah theihna tha tak a nih thu a sawi bawk.

Muga pangangte hi khawvelah India hmarchhak State-ah chauh hian an awm thei a, tun dinhmunah Muga pangang seed cocoon man hi a chi tur atana lei chuan pakhat Rs. 3/- a ni a, la duang tur atana lei a nih chuan Rs. 1.90/- man a ni. Muga pangang tui Kg 1 man chu Rs. 14,000/- niin, Muga silk la duang Kg khat man chu Rs. 28,000/- vel bawr a ni.

Mizoramah hian Muga pangangte hi a ram tla awm nualin, Bul leh Nauthak hnahte hi an chaw a ni a, heng thingkungte hi Mizoram hmun tinah hmuh tur a awm a ni. North East phai khaw lumah nipui laiin Muga pangang khawi hi hlawhchham thin a ni a, Mizoramah erawh chuan tha takin khawlum lai pawhin khawi hlawhtlin thin a ni a, kuminah pawh hlawhtling taka khawi niin, cocoon thar chhuahte hi a chi tur atan siam mek a ni.

Central Silk Board lam pawhin Mizoram that dante hriain Muga pangang ch? siam programme hi an rawn nei a, tun tumah hian pangang tui engemawzat thar chhuah theih beisei a ni a. Heng pangang tui thar chhuahte hi Mizorama pangang khawitute tana duan a nih bakah phai lam atanga ngenna a a awm nual bawk avangin thawn chhuak tura ruahmanna neih a ni a. Sericulture Department leh Mizoram University-te chuan kumin August ni 4 khan Sericulture tih hmasawnna tur lam hawi thawhdunna thuthlung, Memorandum of Understanding (MoU) an ziak a ni.

Vawiin hun hmanah hian Sericulture Department hnuaia thawktute bakah Central Silk Board (CSB) atangin Dr. Dip Gogoi, Research Extension Centre (REC), Aizawl in-charge leh a thawhpuite an tel bawk.