Sericulture Department Sales Emporium chu vawiin chawhnu dar 2:00 khan Sericulture Directorate building, Chaltlang ah Sericulture Minister Pu Nihar Kanti Chakma-in a hawng.
    
Khuallian Disaster Management & Rehabilitation Minister ni bawk Pu Nihar Kanti Chakma chuan tunhnaia Aizawl khawpui chhunga chhiatna rapthlak tak a thlen laia Sericulture Sales Emporium hawnna hun hman a tul ve miau si chu a inthlahrun thu a sawi hmasa a. Sales Emporium buatsaih chu Department thilsiam pholanna remchang tak a nih avangin Department tan a pawimawh hle a ni, a ti. Department hmasawnna tam tak te chu Officer leh staff te thawhho that rah a ni tiin thawktu te zawng zawng chungah lawmthu a sawi bawk. Department mamawh lian tak tak, hun rei tak atanga an lo dil tawh thinte tihhlawhtlinsak tu Chief Minister Pu Lal Thanhawla hnenah lawmthu a sawi bawk. NLUP chungchangah Sericulture Department atanga beneficiary Pi Lawmsiami, Phaileng ‘S’-in Mizoram huapa lawmman pahnihna a dawng thei leh Pu Chinliana, NE Tlangnuam-in Aizawl District huap lawmman pathumna a dawng thei chu chhuanawm a tih thu a tarlang bawk. Minister chuan Sericulture Department chu Mizoram kuthnathawktu te tan, a thawktu ten theih tawpa kan beih zel chuan Mizoram tana department chhenfakawm tak a ni zel dawn a ni, a ti bawk.
    
Sericulture Director Pu Donatus Engzananga chuan an Department-in hlawhtlinna a neih theihna tura Department mamawh tam tak Sorkar hnena an dil tihhlawhtlinsaktu Mizoram Sorkar chungah lawmthu a sawi a, Sales Emporium atanga hlepchhuah zawng zawngte chu sorkar sumah chhunluh zel tur a nih thu a sawifiah. Pangang khawitu te mamawh chi hrang hrang chu subsidy-a lei theih a nih thu a tarlang bawk.
    
Sales Emporium hawnna inkhawm hi Sericulture Secretary Pu C.Lalthankhuma’n a kaihruai a, Silk puan tahtu ten an hmanpui bawk a ni. Sales Emporium ah hian silk atanga puantah, shawl, rizai leh thildang chi hrang hrang siamte, a duh apiang tana lei theih turin phochhuah a ni.