Thli chhia “Mahasen’ naktuk ni 16, ningani zan atanga tleh tura rin anih avangin sikul naupangte an him zawk beiseiin Chief Minister Pu Lal Thanhawla chuan naktuk Ningani chawhnu atangin zirna in zawng zawng, college tiam loin zirtawpni thleng khar vek turin thupek a siam a. Ningani zan leh Zirtawpni te hian sorkar function leh mipui punkhawmna ang chi buatsaih loh nise tiin, Pu Lal Thanhawla chuan ngenna a siam bawk a ni.

Cyclone Warning Division, Indian Meteorological Department, New Delhi atanga thu hnuhnung ber Chief Minister an rawn hriattirah thli chhia ‘Mahasen’ tleh tur hun chu ala ngai reng nia hriat a ni a. Naktuk ni 16, ningani zan dar 9:30 - 10.00 vela Mizoram lo thleng tura rin a ni.

Lunglei leh chhim lamah chuan 45-55 kmph vela chaka tleh tura ngaih a ni a, 65 kmph pawh a thleng thei a ni.He thli chhia hi ruahpui pai thliin a zui rin a ni a, hei hian darkar 24 thleng awh tura ngaih a ni bawk. A kawng hi Lunglei atangin hmar lamah Aizawl lo pheiin, Champhai lampang a chho dawn nia hriat thar a ni.

Hemi avang hian Chief Minister Pu Lal Thanhawla chuan mipuite chiai lo tura chah nawn lehin, mahni theih ang tawka inralring tur leh Pathian thil tihtheihna a innghat turin a ngen a. Sorkar department zawng zawng pawh an theih anga inralring turin a hriattir bawk a ni.

Kum 2009 - 10 atanga training pek vek tawh Disaster Response Force mi fel tak tak sorkarin mi 400 vel lai a nei a, a tulna apiangah heng mi tlawmngaite hi koh theih reng an ni a, heng a hnuaia tarlan emergency helpline atangte hian biak pawh theih reng an ni.

Emergency Helpline Number te :

1.  D.C. Aizawl                -      0389-2329202 / 2321918 / 9436768938
2.  D.C.Lunglei               -       0372-2324121 / 2324120 / 9436141349
3.  D.C.Saiha                 -       03835-222024 / 222033 / 8974053013
4.  D.C.Lawngtlai            -      03835-232805 / 232001 / 9436141459
5.  D.C.Champhai          -       03831-234402 / 234401 / 9436141716 / 8414047698
6.  D.C.Serchhip            -       03838-222432 / 222410 / 9436773077 / 9436143012
7.  D.C.Mamit                 -       0389-2565220 / 2565221 / 8974053801 /
8.  D.C.Kolasib               -       03837-220001 / 220002 / 9436144362