Sericulture Minister Dr K Beichhua chuan nimin khan South Sabuala Silk pangang khawina, Muga Rearing farm a tlawh. 

South Sabuala Sericulture Department Common Facility Centre-ah khawtlang hruaitute nen inkawmhona hun hmangin Dr Beichhua chuan Sericulture hmanga ram leilung hausakna haichhuah na chang kan hriat loh a hlauhawm thu a sawi a, Muga silk pangang enkawlna atana India ramah Mizoram boruak aia tha a awm loh thu a sawi. Mizoram sorkar chu Pathianin hmalam panin a hruai zel a ni, tiin ei leh bara kan ram intodelh hi sorkar thiltum a ni a, kan intodelh loh chuan midangte tan malsawmna a nih theih loh tih sawrkar in a hmu chiang hle a ni, a ti, Sericulture Minister chuan India ramah Silk pangang khawina atana Mizoram chu potential area a ni tih sawiin, heng atang hian a leilung hausakna chhawr tangkaitu turin Mizorama  loneitute a sawm nghal a ni.

SEDP  kalpui  turin Board 14 din fel a nih tawh thu leh project base-a kalpui a nih tur thu sawiin, a hlawhtlinna chu mipuite chungah a innghat a ti a, mipui tawiawmna a ngen nghal bawk. 

Khawtlang hruaitute nen hun an hman zawhah khawthim nghakin Muga plantation farm-ah silk pangang, cocoon siam turte an sengkhawm nghal a ni. 

Muga Silk pangang te hi bûl thing hnah ei chi niin, khaw en laiin thing hnah an ei thin a,  khawthim hnuah cocoon siam turin thingkung atangin lei lamah an chhuk thla a, sengkhawm leh niin, cocoon an siamna tur bikah dahhran an ni thin a ni.  

Dr Beichhua hi Bamboo Board Vice-Chairman Dr K Pachhunga leh department official ten an tawiawm a ni.