Tun hnai ruahsur leh thli tleh chuan Lunglei District hmun hrang hrangah harsatna thlenin - in chhia, kawngpui min, leimin in kawngpui a hnawhte leh luilian in chenna hmunhma a chim mek te a awm nual a. Heng chhiat tawhna thleng mekte sawiho tur leh chhiatrupna la thleng zel thei laka Lunglei District inpuahchahna thlirho turin Lunglei District Disaster Management Authority (DDMA) chuan vawiin chawhnu khan Lunglei Additional DC Pu David Liansanglura Pachuau leh Lunglei SP Pu C. Lalthanmawia hovin Emergency Meeting an nei.

Meeting-ah hian Lunglei SDO (S) Pu Lalnundika chuan chhiat tawkte chhanchuah hna kalpui dan leh chhiatna hmachhawn tura Lunglei District inpuahchahna tlangpui a sawifiah a. Tun dinhmunah Tlabung khawthlang tuipui lian, Zotlang Tourist Lodge bul lei tlahniam leh leimin, Zohnuai, Luangmual leh khaw chhung hmun danga leiminte leh kawngpui hmun hrang hranga leimin leh lei tla ah te a tul angin ngawrh taka chhawmdawl leh disaster management hna kalpui anih thu a tarlang. Khawtlang tupui lian avang hian Tlabung khua ah chhungkaw 100 vel bawr an in thiar chhuak tawh a. Serhuan ah chhungkaw 120 an in thiar chhuah tawh bakah Tipperaghat, Bindasora leh a chhehvel ah te pawh chhungkaw tam tak an in thiar chhuak mek a, hmun him lam pan pui an ni. Nimin tlai khan DM&R Lunglei District Organizer Pi Chuaupari Pachuau leh staff te Tlabung thleng thla in tui chimna hmun hrang hrang a hmunah an tlawh a. A mamawhte hnenah silpaulin an sem bakah Lunglei atangin silpaulin, diesel, petrol leh mamawh dang thawn thlak zel a ni ang.

Meeting ah hian Lunglei District kalpawhna kawng pahnih World Bank Road (Aizawl-Thenzawl-Lunglei Road) leh NH 54 ah te leimin thleng mek chuan chhimlam District mipuite tan harsatna nasa tak a thlen theih thu sawiho a ni a. Motor tlan dan tur leh khap chin ruahman turin SP leh staff te mawhphurhna pek an ni a.  A tul anga leimin tifai vat tura PWD hotute inpuahchahna pawh thlirho a ni. P&E leh PHE hotute nen current leh water supply pek chhuah chungchanga hmalak dan tur an sawiho bawk. Khuarel chhiatna alo thlena a nghawng kal chho zel mihring hriselna tichhe thei hri (disease) te laka mipuite an him theinan Health and Family Welfare Department hotute pawh tan la chhunzawm zel turin Committee chuan a ngen a ni.

DDMA member-te hian Zotlang Tourist Lodge bula lei tla hniam chu a hmunah kalin an enfiah a. He kawngah hian motor lian tlan tir a him tawhlo avangin Lunglei SP in motor tlan dan tur thupek ti chhuak thuai se tih an rel nghal a. Zotlang lei khi/lei tlahniam hi a nasat em avangin hetiang lam mithiam Mizoram sawrkar hnuaia geologist ten site inspection nei vat tura ruahmanna siam ni se tih an rel bawk. Silpaulin stock neih zat pawh sawiho niin silpaulin lian leh te lei belh vat turin ruahmanna siam nghal a ni. District Disaster Management Authority chu a tulna apianga che chhuak turin an inralring reng a. Thli leh ruah avanga Lunglei hmun hrang hranga leimin, mimal leh vantlang thil tihchhiat te hi Lunglei Bawrhsap chuan a hnuaia officer te tir chhuakin a enfiah tir tawh a ni. Department hrang hrang ten an mawhphurna bawhzuiin an chet chhuah mek bakah chhawmdawl leh chhanchhuah hna thawk turin 2nd Battalion MAP hnuaia Disaster Response Force platoon khat an che chhuak tawh a ni. A tul hun apiangah 9774294825 (SDC i/c DMR) leh 9862653478 (DO, DMR) ah te engtik lai pawhin an phone theih a ni.