Vawiin chawhnu dar 1 khan MZP Sub Hqrs Hnahthial chuan Zirlai tithate chawimawina Hnahthial Electric Veng community hall ah an buatsaih a, Pu Lalchhandama Ralte Minister School Education chuan khuallian niin a hmanpui.

Pu Lalchhandama Ralte chuan  hnam leh sakhua a dam nan zirna-in dinhmun sang tak a luah a ngai a, zirna-ah zofate hi top class-ah zel awm tum ila, chumi hmang chuan kan hnam chhan a ngai a ni, a ti. Zirlaite chu tei rei peih, tuar peih ni  tur leh tun lai inelna sang takah ding chhuak ngei turin a fuih a. All India Service-ah te pawh tling thei ngei tura tan la turin zirlaite a sawm a, District tina post pawimawh Mizovin kan luah theih nan zirlaiten theihtawp chhuah a ngai a, ram mamawh chhanna nih a pawimawh a ni, a ti. Minister chuan khawtlang nu leh pate pawh zirnaah rilru siam thara khawtlangah zirna chu dah sang ber turin a sawm a. Sorkarin Zirna hmun hma a neihte chu thil dang atan it mai lova, humhalhpui tlat turin a sawm a ni. Zirtirtute pawh zirlaite tan tih tak zeta an service hlan turin a sawm a. Naupangten an pan leh an bawm ni tur khawpa tan la sauh sauh turin a fuih a ni.

He huna thusawi tu dang Pu Lalmuanpuia MLA pawhin sorkar thar chuan thla 6 chhung chauh hna a thawh tawhah kawng  hrang hrangin Mizoram chhunga zirna chuan hma a sawn nghal der a ni, a ti a. District function tur chu mipuiten tawiawm a, Department hrang hrangte hmalak leh hnathawhte thlawp turin a sawm a ni.

Hnahthiala Zirlai titha chawimawinaah hian School Education Minister Pu Lalchhandama hi Pu Lalmuanpuia MLA, Pu Lalhmachhuana Joint Director, Pu KM Lalrindika Under Secretary ten an tawiawm a. Hnahthiala khawtlang  hruaitute, zirtirtute leh zirlai thahnem tak programme-ah hian an tel a ni. Zirlai titha HSLC, HSSLC a I Div leh Distinction te leh BA pass te hnenah chawimawina hlan a ni a. Minister hian Hnahthial khaw chhunga zirna in thenkhat leh SDEO office te a tlawh a ni.