Vawiin chawhnu dar 2:00 khan Christian Hospital Serkawn ah Graduation Programme hman a ni a. He hun hi Dr. Lalramzauva Medical Superintendent chuan kaihruai a, Khuallian ah Pu V. Sapchhunga IAS, Deputy Commissioner Lunglei chu hman a ni.

Khuallian chuan Lunglei in Nurse zirna tha tak a nei chu lawm awm a tih thu a sawi a. Tun a zirchhuak ta te chu rilru puitling tak nen a hnathawk turin a fuih bawk a, Nurse te chu mipui rawngbawltu an nihna hre reng turin leh rawngbawlna rilru pu a an hna thawk turin a chah a, Sawrkar hna thawk te chu khawihmun ah pawh thawh inhuam a an intiam angin chhel taka a mahni post-ah hna kan thawk ngam tur a ni, a ti. Nurse graduate te chu an thiamna leh finna te midang te tana malsawmna a chantir ngei turin a chah a ni.

He Graduation Programme ah hian Khuallian chuan Nurse 19 te hnen ah Certificate hlan in Best Graduate dawngtu Zobiaksangi hnenah ah chawimawina thuziak a hlan nghal bawk a ni.