Serkhan atanga bagha panna kawng Serkhan- bagha road tia hriat lar siam mek chungchang sawiho in vawiin khan Kolasib Bawrhsap Pisa pindan ah thutkhawmna neih a ni.

He hunah hian Kolasib Highway Division PWD EE Er.Sanghrima Chawngthu, ABCI Company project manager Pu Baruah leh a Assistant bakah Bukpui tlangdunga group YMA hruaitute leh VCP te an kalkhawm a, khawtlang hruaitute chuan Serkhan-bagha kawng chu hmun thenkhat ah duhkhawp loh na lai an nei tih an tarlanga heng hmunah te hian lung quality tha tawklo hman ani a, kawng siam chu a tlo lo hle a nih tih sawiin, hei hian serkhan leh bagha inkara cheng mipuite tan harsatna tam tak a thlen ani tih an tarlang bawk.

Pu Sanghrima Chawngthu chuan hmun thenkhata kawng siam tha tawklo te chu a hriatpui thu sawiin hotu sang zawk te hnenah pawh report a pek tawh thu a tarlang a, ama level a harsatna sutkian theih awm apiangah hma a lak reng thu a sawi bawk.

Bawrhsap Pu Zoengsanga chuan ABCI Company hotute chu rinawm taka hna thawk turin a chah a, lung tha tawklo an hman te chu lung quality tha ngeia thlak turin a hrilh a, kumin furpui thlen hma in an hna chu thawh zawh hman tum turin a hrilh bawka, Kolasib District chhunga hmasawnna ruhrel din leh siam kawnga hmalakna reng reng chu belhchian a dawl tur ani tiin mimal tak pawn a vil kual reng tur thu a tarlang a ni. Hnathawh a thatloh chuan mipuiin an tuar thin a, chu chuan kawng tam takah State hmasawnna a ti thuanawp thin a, mipuuite tawrh chu a phalloh thu sawiin Bawrhsap chuan Company te hnathawh chu uluk taka an vil tur thu a sawi bawk a, tunkar inrinni lo awm turah hian Serkhan-bagha kawng siam mek chu a hmun ah ngei a enfiah dawn tih sawiin PWD leh Company hnathawk te bakah khawtlang hruaitute chu tawiawm turin a sawm bawk a ni.

Serkhan-Bagha kawng siam mek hi km 90 vela thui niin km 73 vel chu ABCI Company in an thawk a, km 74 na atanga km 90 na thleng hi ABCI hnuaia Company tho GP Project in an thawk a ni. Sawihona ah hian he kawng siam meka GP Project Company kut thlak na North Hlimen leh Saipum inkar chu a thalo zual lai nia tarlan a ni.