Serlui bialtu MLA, Rubber and Allied Crops Committee Vice Chairman ni bawk Pu Lalrinsanga Ralte chuan Serlui bial khaw hrang hrang a Pawl Sawm (HSLC) leh Pawl Sawm pahnih(HSSLC) passed te lawmpuina thil pek a hlan.

Pu Lalrinsanga Ralte chuan Zirlaite chu theihtawp chhuah a bei tura fuihin hlawhtlinna changa zirlai pass te a lawmpui thu leh tuna an hlawhtlinna chu duhtawk mai lova a aia tha lehzuala hlawhtlinnna chang tura fuihin an kal zelna turah duhsakna a hlan a. Chutihrual chuan an kal zelna turah beidawnna leh hlawhchhamna te pawn a hmuak thei a, chungah chuan beidawng mai lovin, tumruhna, inpumpekna leh mahni inthununna rilru pu tlat chunga an harsatna tawhte chu bei tang tang tura fuihin , Chutihrualin vanneihna chang zo ve ta lo zirlaite chu a tawrhpui thu leh beidawng mai lova theihtawp chhuah zual sauh turin a fuih a, vawiin a kan hmaa hming awmte hi nakinah kan hnungah an awm thei a ni tih rilru pu a tumruh lehzual turin a chah bawk. Zirlai kan nihlai chuan kan zirlaiah kan in sawrbing a tul hle a. Chutihrual chuan zir mawl tawp lova kan zir chhuah hnua kan tum a chian a pawimawh hle thu sawiin ka zir chhuah hunah enge ka nih ang? Eng kawngah hian nge kal ila ka hlawhtlin ang a, ram leh hnam tana mi tangkai ka nih theih ang tih hi zirlai kan nih lai atanga kan inzawh fo a tul hle a, Zir mawl tawp lova tum chiang tak leh kawng mumal tak zawh a kan zir a ngai a ni. M.A val satliah ringawt nih tum lova chhawr tlaka kan zir a ngai a ni. Tin, kan zirlai mai bakah kan zirlai a tel lo, hlawhtlinna kailawn kan zawhna kawnga min pui theitu tur thildang pawh hriattel kan tum tur a ni a ti bawk.

Rubber and Allied Crops Committee Vice Chairman chuan zirlaite mai bakah khawtlang pawhin kan khaw hawi tihzau a tul thu sawiin mawhphurhna tam tak kan nei ve bawk tih kan hriat a tul hle. Khawtlang pawh hian zirlaite kan chawimawi thiam a, kan dah pawimawh thiam a tul hle a. Zirlai an nihlaia an hlawhtlinna te hre tha duh lova, officer an nih hnu chauh a kan chawimawi a, kan khawtlang ti hming tha tu anga kan chhuah hi kan sim a hun hle mai. Zirlai an nih lai atang hian kan ngaih pawimawh a, an hlawhtlinna te hi kan hriatpui a tul takzet a ni. Chu chuan an hma hun zelah tumruhna leh chona nasa tak a thlen zawk dawn a ni a ti a.

Pu Lalrinsanga Ralte chuan sorkar tharin zirna a ngaih pawimawh thu sawiin, kan education system chhe lutuk siamtha turin sorkarin hma a lak mek thu a sawi a. Chumi atan chuan zirtirtu engemawzat lak a tum thu a sawi a. Zirtirtute hi zirlaite hlawhtlinna phen a pawimawh tak an ni a. Chuvang chuan zirtirtute chu hlawh lak nan chauh a zirlaite hmang lo turte, sorkarin hlawh a pek chhan ang ngei a rawngbawlna a ngai chungin kan zirlaite tha tak a zirtir a, chhawrtlaka chher chhuak turin a fuih a. Zirtirtu awm tha duh lo te, harsatna bik riau nei ni silo, mahni post a awm tha duh lova aikal la te leh zirtirna pe tha duh lo te chu sorkarin a dim loh tur thu sawiin sorkarin a rawih ang ngei a an naupangte theihtawp chhuah a zirtir turin a fuih nghal bawk a ni.

Bialtu MLA hian a bial chhunga pawl sawm (HSLC) leh Pawl Sawm pahnih (HSSLC) passed zawng zawng te hnenah hian lawmpuina thilpek Pu Clement Liankunga lehkhabu ziah 'Ka zinkawng bumboh' leh Citation a pe a, Serlui bial khaw hrang hrang a HSLC leh HSSLC a Distinction a passed zawng zawng te hnenah hian Laptop a pe tel bawk a ni. Heng lawmpuina hi hmun hnih Bilkhawthlir Community Hall ah leh Vairengte Community hall ah neih a ni a. Bilkhawthlir ah hian Bilkhawthlir Joint VC huaihawt in nimin khan neih a ni a, Vairengteah pawh Vairengte Joint VC bul tumin vawiin khan neih a ni ve bawk.