Vawiin ni 22.5.2019 chawhma dar 11 khan Dawrpui Multipurpose Centre-ah Aizawl East-II A/C chhunga HSLC leh HSSLC Pass tharte lawmpuina bialtu MLA leh Minister ni bawk Pu Robert Romawia Royte-an a buatsaih.
Aizawl East-II bialah hian Veng pasarih - Dawrpui Veng, Saron Veng, Chhinga Veng, Tuithiang Veng, Armed Veng, Armed Veng South leh Chite Veng a awm a. Heng Veng pasarih atanga HSLC pass mi 337 te hnenah English- Mizo Dictionary leh Bags leh HSSLC pass mi 267 te hnenah Kristian Encyclopaedia leh Bags pek vek an ni. MBSE hnuaia HSLC-a top ten-a lang pha pathum - Samuel Laremruata, Chhinga Veng, 5-na; Vanlalpeksanga, Armed Veng South, 8-na leh Sarah Lalhmingmawii, Dawrpui, 9-na te hnenah Toppers dangte rualin ICT Minister Pu Roberta hian ICT Deptt kaltlangin Laptop a pe vek dawn bawk a ni.
Heng bakah hian Minister Pu Robert Romawia Royte chuan a bial chhunga Govt. H/S -2, Kohhran School -2 leh Private School - 4 te hnenah HSLC & HSSLC exam-ah result tha tak an neih Lawmpuina leh Chawimawina thuziak a hlan bawk.
He Result lawmna inkhawm hi Assembly Speaker Pu Lalrinliana Sailo-in Khuallian niin a hmanpui a. Zirlai pass thar zawng zawngte chu tuna an hlawhtlinna hi an bul tanna a ni tih hrerenga, rim tak leh taima taka an zirna chhunzawm zel turin a chah. Ram changkang zawka hnathawh an uar angin, zuk leh hmuama insuma, hnathawh hreh nei lova tumruhna leh thawhrimna nen an zirlaia tum mumal tak neia zir zel turin a chah.
Pu Robert Romawia Royte pawhin thusawiin Aizawl East-II bial atanga HSLC pass thar 338 leh HSSLC Pass thar 267 te chu a lawmpui takzet thusawiin Assembly Speaker Pu Lalrinliana Sailo bakah Sawm bik tam takin Pass Lawmna an hmanpui thei chu lawmawm a tih thu a sawi. Minister chuan ram leh hnam, chhungkua leh mi mal changkanna atana pawimawh ber chu Zirna a nih avangin Aizawl East-II bialah zirna uar lehzual a tul a ti a, Aizawl East-II biala Sikul tam zawkin Result tha tak an neih avangin a chhuangin a lawmpui takzet tih a sawi.
Er. Lalengzuala, Informatic Officer, I& CT hnen atangin tunlai thiamna leh hmasawnna hmanga IT khawvela zirlaite hriat tur leh, Scouts & Guides, NCC leh Sports lama zirlaite hriat tur thil pawimawhte Sports Director Pu Zothanmawia ten an sawi a. Zirlai pass thar nu leh pate aiawh leh Bial chhunga Zirna In aiawh hnen atangin thusawi ngaihthlak a ni bawk.
He inkhawmah hian Zirlai Pass thar te leh an nu leh pate bakah Bial chhung NGO, YMA, MUP, MHIP leh Local Council hruaitute leh MNF Block leh Unit hruaitute nen mi sang chuang zet an kal khawm a ni.
