Vawiin chawhma khan Vanapa Hall-ah St. Joseph Higher Secondary School chuan HSLC leh HSSLC pass thar chawimawina hun an buatsaih a. I&PR Minister Pu Lalruatkima chu Khuallian a ni.

Khuallian Pu Lalruatkima chuan St.Joseph Higher Secondary School in hlawhtlinna duhawm tak an nei chu lawmawm a tih thu a sawi a. Inpekna leh tumruhna chuan hlawtlinna a thlen thin a ni tiin hlawhtlinna tak tak chu exam-a tihthat piah lamah thiamna neih hi a ni, a ti a. Kalkhawmte chu tum mumal tak nei chunga lehkha zir thin turin a fuih a. Lehkha tha taka zir bakah kan talent-te tihpun a pawimawh hle a ni tiin mahni tui zawng leh thiam zawng hmangin eizawnna puitling neihna kawng a inhawn phah thei a ni, a ti a. Minister chuan India rama ziak leh chhiar tamna ram kan ni hi a lawmawm hle a, hemi ringawt hi duh tawk lovin kan thiamna hi ram tan kan hmang tangkai tur a ni tiin UPSC in kumtin a huaihawt thin Civil Service examah hian mizo hming lang ngei turin tan lak a ngai a ni, a ti a. Zirlaite hlawhtlinna atan zirtirtute leh nu leh pa an pawimawh hle a, nu leh pate phei chuan kan fate kalna tur kan kawhhmuh thin tur a ni tiin mawhphurhna sang tak nu leh paten an nei a ni, a ti a. School changkang, state pawna school tha tak tak te el pha tur din a pawimawh a, zirna tha (quality education) neih chu sawrkar thil ngaih pawimawh ber pakhat a ni, a ti a. An kal zelna turah duhsakna a hlan nghal a ni. 

Khualzahawm SCERT Director (Retd.) Pi Malsawmthangi chuan thu sawiin zirlai thahnem tak enkawla result tha tak St. Joseph Higher Sec School in a neih theih chhan chu Principal leh staff-te thawhrimna vang a ni, a ti a. Thawhrimna chuan hlawhtlinna a thlen thu sawiin beiseina nei tlat turin zirlaite chu a fuih a ni.

St. Joseph Higher Secondary School hi kum 2003 khan din niin kumin hian HSLC ah 1st, 7th leh 10th rank an hauh a. English, Mizo, Social Science leh Science subject ah topper an nei tel a. An pass percentage 100% a ni. HSSLC Science-ah 5th leh 8th rank neiin Biology topper an nei a, Commerce-ah 2nd, 6th, 7th leh 10th rank neiin Arts-ah 8th rank an nei bawk a ni. 

 St. Joseph Higher Secondary School Principal Pu C. Laltlansanga chuan kalkhawmte lawmna thu a sawi a. Lairam Medical Centre Medical Superintendent Dr. B. Zonunsanga leh MZP President Pu L. Ramdinliana Renthlei chuan thusawina neiin Khuallian leh Khualzahawm nen zirlai tithate hnena certificate leh pawisa fai hlanna hun an nei a. Vawiin hian zirlai hlawhtling 402 chawimawina hun an nei a ni.