State Level Sub Committee on Green Mizoram 2019 chu vawiin khan Chairman Pu T.J Lalnuntluanga, Minister, Environment, Forest & Climate Change Office Chamber, New Capital Complex ah an thukhawm.

Inkhawm kaihruaitu Pu T.J Lalnuntluanga, Minister, Environment, Forest & Climate Change Department,. Chairman State Level Sub Committee on Green Mizoram 2019 chuan Sub Committee kalkhawmte chungah lawmthu sawiin, tunlai khawvel lo lum zual zelah thingphun kan uar deuh deuh a tul tawh a ni, a ti a. Thingphun tam a tul viau ruala pawimawh zawk chu phun nun tam a ni tiin a ram leilung mil tur ang zela hmalak a ngaih thu a tarlang bawk. Minister chuan kan thingphun tur kan buatsaih kawngah pawh nungchate tana tangkai, chaw atan an rin theih tur kan buatsaih hram hram a pawimawh a ni a ti bawk. Kum lo kal zel turah pawh thingphun tur quality tha buatsaih turin department hotute a chah bawk a ni.

Meeting-ah hian kumin 2019 Green Mizoram Day, June ni 11 a hman dan tur chipchiar takin sawiho a rel nghal a ni a. Kumin thupui atan “Thing phunin Sik leh Sa vawng tha rawh” tih a ni. June ni 11 zing dar 7 : 00 ah a hawnna pui ber Assam Rifles Compound, Khatla-ah buatsaihin Chief Minister chu khuallian nise, he inkhawmah hian kangmei ven chungchanga District hrang hrang ti tha te lawmman sem nghal nise tih te rel a sawiho a ni. Hemi zawh hian Chief Guest, VIP’s, Secretaries leh Sorkar hotuten thing tiak phun nghal tura ruahman a ni bawk. Department hrnag hrangte leh tlawmngai pawl hrang hrang bakah, NSS, MIFCO, ANFU, ASEP, CEP, SENVA, BIOCOME, Green Mizoram Networks te leh a dangte chuan tukthuan eikhamah thing phun tura ruahman a ni bawk.

Meeting chuan kan ramngaw lo chereu zel tur venna atan leh sik leh sa lo danglam chho zel avanga harsatna lo thleng tihrehna tura thingphun uar tura inzirtir tul a ti a. Hemi atan hian Bulb SMS, Tv Show, Radio Talk leh Talk Show buatsaih nise tih te rel ho a ni bawk.

He meeting-ah hian Green Mizoram Day 2019 hlawhtling taka hman a nih theih nan mawhphurtu hrang hrangte a ruat nghal a, hengte hi State Level Committee on Green Mizoram ah thlen leh a ni ang.

Green Mizoram Day hi kum 1999 atangin hman tan niin thing tiak hi 24,03,112 phun a ni tawh bawk.

Meeting-ah hian State Level Sub Committee on Green Mizoram members te an tel tha hle a ni.