No.198/2021-2022

Kolasib dated 20th April 2021: Vawiin khan Serlui bialtu MLA Pu Lalrinsanga Ralte, Rubber & Allied Crops Development Board Vice Chairman ni bawk chuan Vairengte Screening point a tlawh a. Covid 19 thawh hnihna lo thleng leh ah hian Vairengte Screening point-a duty te mamawh leh inbuatsaih dan te a enpui.

Serlui bialtu MLA ho hian Vairengte Forest IB-ah SDO (Civil), Medical Officer, SDPO, OC, Vairengte Joint VC, Joint VLTF-te leh Joint YMA hruaituten thutkhawmna hun an nei a. Vairengte Screening point chu Ragt negative certificate lem hmanga kaltlang leh certificate nei lova kaltlang an awm thin nia Social Media lam a thu thehdarh awm thin chungchangte sawiho niin sawrkarin Covid-19 chungchanga SOP a duan anga khauh tak a endik hna kalpui a nih tur thu te sawiho a ni. Serlui bialtu MLA chuan Chief Minister zahawm tak leh Health Minister zahawm tak te'n hrileng avanga zoram mipuite'n kan nitin mamawh (essential commodities) lak luhna kawngah harsatna kan tawh lohna turin Vairengte chauh ni lo, Saiphai leh Phaisenah Screening point te dah turin ruahmanna siam mek a nih thu a sawi a.

Pu Lalrinsanga Ralte chuan “Vawiin dt.20/04/21 (thawhlehni) atang hian Phaisen Screening point hi kalpui tan tur niin Saiphai Screening point pawh ni hnih khat hnu a kalpui theih mai tur a buatsaih a ni,” a ti a, “Saiphai leh Phaisen Screening point a thawk tur Lab Technician leh Helper te pawh dah turin Health Department lam pawh an inbuatsaih mek a ni,” a ti. Serlui bialtu MLA chuan Vairengte, Phaisen leh Saiphai chu Mizoram kawtchhuah an nih thu te, Mizoram zin vei vak mi zaa sawmriat (80%) velin luh leh chhuahna atana an hman thu leh kan ei bar lakluhna kawng pawimawh ber atan a hman an nih thu a sawi a. Hemi a nih avang hian tuna Covid 19 hrileng thawh hnihna lo thleng leh ah hian Vairengte, Saiphai leh Phaisen mipuite chu fimkhur tur a chahin lirthei leh zin mite lutchhuak an awm leh awmloh chungchanga sawrkar in hma a lakna kawngah sawrkar thawhpui chhunzawm zel turin a sawm. Chutih rualin Vairengte, Saiphai leh Phaisen khua te chu Zoram hmel lanna tur an nih dawn avangin mamawh leh chakkhai lam tur a lo kal zin mite chu hawihhawm tak a lo dawngsawng turin a ngen nghal bawk a ni.

Pu Lalrinsanga Ralte, Rubber & Allied Crops Development Board Vice Chairman chuan Vairengte Screening point a thawkte tan an mamawh leh a tul anga an hman turin Rs. 10,000/- (Singkhat) a pe a, Vairengte Joint VLTF-te'n a tul leh mamawh hun a an hman atan Joint VC kutah Rs. 10,000/- (Singkhat) a pe bawk a ni.