No.197/2021-2022

Aizawl, 20th April, 2021 : Vawiin khan Food, Civil Supplies & Consumer Affairs Director Pi Ramdinliani hovin a pisa ah sawrkar laipuiin naupangte zinga thisen tlakchhamna (anemia) leh undernutrition um bo tura a hmalakna pakhat "Fortified Rice Scheme" Mamit district a kalpui dan tur ngaihtuahin thutkhawm a ni a, FCS&CA, School Education, leh Women & Child Development department bakah Food and Drug Administration hotute an tel a ni.

Supply Director Pi Ramdinliani chuan buhfai thami (fortified rice) chu Mizoramah chuan a bul tan nan Mamit Aspirational district ah kalpui hmasa tura an inbuatsaih thu sawiin, he buhfai hi sawrkar laipuiin naupangten hriselna kawnga hma an sawn theihna tura a ruahman niin, buhfai an rawn pek hun hunah a sem hna hi kalpui a nih tur thu a sawi a. Mizoram chhunga district zawng zawng tuam chhuah vek tum a nih thu a sawi a ni. Fortified rice hi mihring ei atana him a nih thu leh Food Safety and Standards Authority of India (FSSAI) pawhin a him tih an pawm thlap thu a sawi bawk.

Vawiina thukhawm hian fortified rice tangkaina leh thatna te mipuite hrilhfiah hna (awareness campaign) uar taka kalpui dan tur an ngaihtuah a, Mamit district chhunga cheng tawng hrang hrang hmang ten awlsam taka an hriatthiam theih turin kawng chi hrang hrangin ruahmanna an siam a ni.

Fortified Rice scheme hi Integrated Child Development Services (ICDS) hnuaia Anganwadi centre hrang hrangah leh sawrkar sikula Mid-day Meal Scheme kaltlanga sem tur a ni a, naupangte zinga thisen tlakchhamna (anemia) leh undernutrition um bo tura a hmalakna niin, buhfaiah iron, folic acid leh vitamin B-12 an telh a, buhfai pangngai aiin a man pawh a to deuh a, buhfai pangngai nen 1:100 ratio a chhum pawlh tur a ni.

World Health Organization (WHO) pawhin chaw atana buhfai ring mihring chenna ah, mipuite hriselna kawnga tihhmasawn nan fortified rice (iron, vitamins leh folic acid telna buhfai siam) ei hi a pawimawh thu an lo puang tawh bawk a ni.