207/2022-2023

Kolasib Dated 20th April 2022 : Hriselna Kutpui 'Health Mela' hmanna kal zelah vawiin khan Serlui Assembly Constituency bialtu Pu Lalrinsanga Ralte chuan Block Level 'Health Mela' Vairengteah a hawng.

Health Mela hawnna hun hi Vairengte Community Health Center-ah hman niin Kolasib Chief Medical Officer Dr. Lalawmpuia Chhangte chuan hun a kaihruaia a. Serlui Bialtu MLA Pu Lalrinsanga Ralte chuan Health Mela hawnna ah hian thu sawiin ram leh hnam, khawtlang hmasawnna chu mipuite'n hriselna kan ngaipawimawh danah thui tak a in nghah thu a sawi. Hriselna chu mahni in leh a vel tih faite, ei leh in ṭha ngaih pawimawh leh zuk leh hmuam a insum theihte aṭanga a inṭan thu a sawi bawk. MLA chuan Mizoram chhunga Doctor-te leh damdawiin a thawktute zawng zawng mipuite tana an inpekna chu fakawm a tih thu a sawi a. Natna engpawh mipuite'n kan neihin mahni a pai dam mai tum lova Doctor-te rawn hreh lo turin kalkhawm mipuite chu MLA chuan a chah bawk.

Dr. Lalawmpuia Chhangte, CMO pawhin thu sawiin taksa hrisel chuan rilru hrisel a siam a, chu chuan kan thlarau nun pawh a ti hrisel a, hna thawhna kawngah pawh phurna leh tha thona a thlen ṭhin a ni a ti a. Kolasib CMO chuan kan hriselna kan ngaihthah hian chhungkua leh khawtlang tan kan thiamna leh theihna kan hmanchhuak zo lo fo ṭhin a, kan ṭangkai tur angin kan ṭangkai lo phah ṭhin a ni tiin Health Mela a kalkhawmte hmaah hriselna pawimawh zia thuchuah a sawi.

Vairengte CHC a Health Mela hmanna ah hian a thlawn a inentirna Stall hrang hrang Doctor leh mithiam engemaw zatin an ṭhutchilh a. Medicine, Surgery, Orthopedic, Pediatrics, AYUSH, Eye, Dental leh Gynecology & Obstetric lam Doctor-te a mamawh apiang tan pan theihin an awm a. Physiotherapist leh Women & Child Development lama thawktute rawn tur an awm bawk. Natna hri chi hrang hrang Tuberculosis (TB), HIV, Malaria, Non Communicable Diseases (NCD) te Screening-na hmun a awm bakah Covid-19 Vaccination kalpui a ni a. PMJAY hnuaia Unique Health ID siamna kalpui a ni bawk. He thu buatsaih lai hian Vairengte CHC Health Mela a inentir hi mi 600 vel an awm tawh a ni. Serlui Bialtu MLA Pu Lalrinsanga Ralte hian vawiin a Health Mela hmanna a damdawi sem chhuahah indaih lohna a awm chuan a indaih loh a tum suk tur thu a sawi bawk a ni.

Attachment

  • Loading attachment...