2936/2022-2023

Champhai, the 4th December, 2022: Hunpui Christmas leh Kumthar lo thleng tur denchhena ruihhlo do beihpui thlakna Special Drive kalpui mek zelah Excise & Narcotics Department, Champhai leh Sesih khuaa Presbyterian Kohhran leh Zomi Baptist Church-te tangkawp buatsaihin vawiin Pathianni chawhnu dar 1 khan Sesih Community Hall-a ruihhlo hman khawloh laka inven dan inzirtirna, Anti-Drugs Awareness Campaign chu 'Say NO to drugs and YES to life' tih thupui hmangin neih a ni.

He hun hmanpuitu Pu Vanlalvura Ralte, Asst. Comissioner of Excise & Narcotics Department Champhai leh a thawhpuite chuan ruihhlo leh a kaihhnawihin nghawng thalo hrang hrang a thlen theih dante leh hemi laka tanrual a pawimawh thu an sawi a. Kalkhawmte chu ruihhlo laka inthiar fihlim tur leh midangte zirtirtu nih tum theuh turin an chah a ni.

Ruihhlo hman khawloh leh a nghawng thalote zirtirna kalpui mek zelah Excise & Narcotics Department Champhai chuan hma a la zel a; hunpui vuakvetah Anti-Drugs Awareness Campaign Special Drive kaltlang hian District chhung hmun thlan bikahte zirtirna an nei chho zel bawk a. Special Drive kaltlang hian Champhai Vengthlang, Hnahlan, Khawbung leh Sesih-ahte program neih a ni tawh a; sawmna an hmuh leh remchan dan ang zelin Anti-Drugs Awareness Campaign hi an kalpui bawk a ni.