“Chief Minister sawmna anga Union Agriculture Minister Pu Sharad Pawar-a’n kum hnih kalta a Mizoram a rawn tlawh tuma a thutiam pakhat, Horticulture College chu session thar atang hian class neih ve tan kan tum a ni” Agriculture Minister Pu H Liansailova’n a ti.
He thu hi zirlai hlawhtlingte lawmna hun veng leh pawl hrang hrangin an buatsaih kal zelah nizana Ramhlun North YMA ten an veng chhung atanga kumina HSLC, HSSLC leh UPSC exam hlawhlting te an lawmna huna a sawi a ni. Pu H Liansailova chuan Mizorama Horticulture College hmun tur thlithlai hian Committee ruat bik leh Central Agriculture University, Imphal Vice Chancellor meuh pawhin Aizawl an rawn tlawh tawh thu sawiin Selesih hmunhma chu tha an tih tlan ber a ni a, helai hmunah hian Class pawh tan tum a ni ta a ni, a ti .Minister chuan zirlai hlawhtling tharte fuihin an zirlai apiangah an zir chhan hre reng tur leh an tum ber tur chu ram leh hnam, khawtlang, nu leh pa te tana chhenfakawm tham zirchhuah a ni tur a ni, a ti a. Hlawhtling tur chuan pawn lam lan dan aiin chhungrila thil inthup a pawimawh fo zawk a ni tiin Agriculture Minister chuan zirlaite pass that leh dinhmun sang an chan ai maha pawimawh chu an thinlung chhunga tumruhna leh tih takzetna a ni zawk, a ti.
Ramhlun North YMA hian kumina HSLC exam-a passed 93, HSSLC exam-a passed 72 bakah UPSC exam-a hlawhtling K Lalbiakchhunga hnenah lawmpuina thuziak an hlan a ni.
