Mizorama World Bank tanpuinaa motor kawngpui thar siamna tur, World Bank Project II kaihhnawiha Mizoram lokal, World Bank hotute chuan tukin khan Chief Minister Pu Lal Thanhawla chu a chenna bungalowah an kawm. World Bank hotute hi Pi Diep Nguyen Van Houtte in a rawn ho a, member panga dangin rawn tawiawmin, tukin hi chuan an zinga pahnih Pu Arnab Bandhopadhaya leh mi pawimawh dangin an rawn tawiawm a ni.

World Bank sum hmanga motor kawngpui thar tur hi Mizoram khawthlang lam Mamit district atanga intanin, Lunglei leh Lawngtlai district te paltlanga siam tur a ni a. World Bank Project II tia hriat hi, Chief Minister Pu Lal Thanhawla sorkarin Central sorkara ruahmanna a siam, a thehluh chu centralin alo pawm avanga World Bank hotute hi a hmuna enfiah tura a teama lokal an ni a. Kawngpui siam tur hi 350 Kms a thui tur niin, senso tur pawh Rs.2000 Crore ruahman a ni.

He kawngpui siam tur hian helai hmun bial, India(Mizoram), Myanmar leh Bangladesh pawh thei tur (Regional Linkage) anih dawn avang pawhin World Bank hian a ngaipawimawh hle a. World Bank Project II hian Kaladan Multi Modal Transit Transport Project hnuaia kawngpui laih mek hi Zochachhuaha pawh thei tur a ni a, Bangladesh lam chu Kawrpuichhuah paltlangin a pawh thei dawn bawka ni.

Chief Minister hi Pu Lalram Thanga, Secretary, PWD, Pu Lianchungnunga, Engineer in Chief, PWD ten an tawiawm a ni. World Bank team member thenkhat ten vawiin khan Champhai district Zokhawthara Land Custom Station tlawhin an kal bawk a ni.

Pi Diep Nguyen Van Houtte te hian Chief Minister an hmuh hnu hian Chief Secretary Pi L.Tochhawng an hmu leh a, chumi hnuah PWD Engineer te nen khunkhan takin an inkawm leh a ni