Vawiin khan School Education Minister Pu Lalsawta chuan Ruatfela Nu tia hriat lar zawk Pi Vanramchhuangi lehkhabu ziak - 1). Sex Education A AW B (Naupangte Tan), 2). Sex Education (Tleirawlte Tan) leh 3). Sex Education (Fate Kaihhruai Nan) tih chu I&PR Auditorium-ah a tlangzarh a ni.

Khuallian Pu Lalsawta chuan mipat hmeichhiatna lama inkaihhruaina bu tha tak Mizoramin a la nei ngai lova, vawiina Ruatfela Nu thahnemngaihna avanga hetiang lehkhabu, puitling chauh ni lo naupang leh tleirawlte tan pawha zirtirna tha tak pe thei kan nei ta chu a chhinchhiah tlak hle a ni, a ti a.  Naupangten sex lama an tihsual chungchang chu sual hrim hrim avang ni lovin thil hriat fuh tawk loh avang a ni fo thin a, nu leh paten kan fate kan khuahkhirh loh lutuk rah kan seng a ni bawk, a ti. Mipat hmeichhiatna hman dik loh hi mi tam tak buaipui, chhungkaw tam tak tahpui thil a ni a, chuvangin heng lehkhabu vawiina tlangzarh tak te chu chhiartu zawng zawng rilru leh khawtlang siamthat nan thil tangkai a nih theih a beisei thu Minister chuan a sawi a ni.

Vawiina lehkhabu tlangzarhna inkhawm hi Upa C.Sangzuala, Ex-MLA in a kaihruai a. Lehkhabu 3 te hi Pu Lalrammawia Ngente leh Lalhruaitluanga Chawngte ten thlirlawkna an nei a ni.