2878/2024-2025

Aizawl, the 6th November 2024 : State Election Commission, Mizoram, Aizawl lehkha No. B. 12015/1/2024-SEC/SHC/66 dt. 6.11.2024 in a sawi angin, Aizawl District huamchhunga Sinlung Hills Area a Sinlung Hills Council, 2024 inthlanpui ni 5.11.2024 a neih a  SHC06-New Vervek Constituency a vote tla te chhiar nawnna (recount of polled voted) chu Er. Lalhriatpuia, District Election Officer, Aizawl kaihhruaina hnuaiah Pisapui Hall, DC Office, Aizawl ah vawiin ni 6.11.2024 tlai dar 4:00 hian neih a ni.

SHC06-New Vervek Constituency a vote tla chhiar nawnna ah hian Election Observer Pu James Lalrinchhana, Pu Mark Lalthanliana, Addl. DC & Dy.District Election Officer, Pi P.C. Zonuntluangi, Addl. DC, Pu Samuel Zodinsanga, Election Officer, Aizawl, Dr. Lalchamliani, BDO Tlangnuam/SDC, Counting Officials atana ruat thar te, Candidates te aiawh Counting Agent te  bakah political party aiawh te an tel a ni. Vote tla chhiar nawnna hmunah hian  venhimna uluk taka kenkawh niin fimkhur tak leh boruak muanawm tak hnuaiah vote tla chhiar nawnna (recount of polled voted) hi neih a ni.

SHC06-New Vervek Constituency ah hian polling station 3 a awm a, chungte chu New Vervek, Lungsum leh Vervek (Damdiai) te an ni a.  Heng Polling Station a vote tla hi a vaiin 953 a ni a (rejected 16 votes), candidate zing a vote hmu tha ber tling a puan tak Pu Lalhlunchhunga, ZPM Candidate hian vote  396 a hmu a, a dawttu Pu C.Lalnuntlanga, MNF Candidate hian vote 384 a hmu a, an vote hmuh zat inthlauhna hi vote 12 (sawmpahnih) a ni.