Vawiin khan UD&PA Minister Pu Zodintluanga chuan Deendayal Antyyodaya Yojana-National Urban Livelihood Mission (DAY-NULM) hnuaia hmalakna peng pakhat Shelter for Urban Homeless (SUH) Scheme hnuaia hma lak tawhna Home hrang hrangte tana training buatsaih chu I&PR Conference Hall-ah a hawng.
Pu Zodintluanga chuan sawrkarin mipuite tan scheme pawimawh tak a duang a, hengte hi sawrkar leh a chhawrtu pawlten tha taka an kalpui theih nan training programme buatsaih a ni, a ti a. Shelter for Urban Homeless scheme hi Supreme Court thutlukna avanga kalpui niin State hrang hranga hmalakna leh hmasawnna hi Supreme Court chuan a vil reng a; chuvang chuan scheme-in a sawi ang thlapin report thehluh leh enzui hna thawh a ni dawn a ni, a ti. UD&PA Minister chuan Aizawl District-a he scheme kalpui mekah hian Home hrang hrang 9-ah refurbishment tih tawh a nih thu leh Home 10 dangah refurbishment tihna tur a ruahman leh mek a nih thu a sawi a. Refurbishment-ah hian Home hmunah ngei UD&PA a thawktute kalin Home/Centre mamawh angte an zir chian hnuah centre/home building thawm that emaw bungraw mamawh pek emaw an ni thin, a ti. New Construction hnuaiah hian Women Shelter Rangvamualah sak zawh tawh a ni a, Zemabawk Cancer Hospital bulah Cancer Patient te tana Chawlhbuk tur sak mek niin State Referral Hospital, Falkawnah ‘Shelter Unit’ (Dharamsala), damlo buaipuitute chawlbuk tur sak a nih tur thu Minister hian a sawi bawk.
India ram khawpui hrang hrangah riahna mumal nei lova khawlaia riak mai mai an tam a, chung mite tana riahna tur him zawk buatsaih chu tul tiin Supreme Court-in thupek a chhuah a. Ministry of Housing & Urban Poverty Alleviation, Govt. of India chuan he thupek bawhzui nan hian DAY-NULM hnuaiah Shelter for Urban Homeless Scheme hi a siam a ni. SUH component thil tum bulpui ber chu khawlaia riak thinten riahna him zawk an neih theih nan leh boruak lum lutuk leh vawt lutuk thinte avanga thihna tam tak a lo tlak hniam theih nana hmalak a ni a. Mizoramah erawh chuan Kohhran leh tlawmngai pawlte hmalakna tha tak avangin khawlaia riak mai mai hmuh tur tam lo mah se, Home hrang hranga hnuchham, tar chak lo, ruihtheih thil avanga harsatna neite enkawlna hmunte hi hmalakna atana hman phalsak turin Mizoram sawrkar UD&PA-in Sawrkar Laipui a ngen chu remtih sak an nih hnuah hmalak zui nghal a ni.
Kum 2014-15 atanga hma lak tan niin kumin sawrkar kum thleng hian SUH hnuaiah Shelter Unit hrang hrang Rangvamual, Zemabawk, New Serchhip leh New Siahaah te sak a ni a. Shelter Unit dang 5 - Champhai, Lunglei, Kolasib, Lawngtlai leh Falkawn (Aizawl)-ah te sak leh mai theihin DPR peihfel a ni tawh. Heng bakah hian Home leh centre awm tawh sa chei hnum leh an mamawhte pê-in (refurbishment) hmalak mek a ni a, Mizoram hmun hrang hrangah Home 48-ah heng tanpuinate hi pek a ni tawh bawk.
Training hawnna programme hi DAY-NULM Mission Director Pu Joseph H.Lalramsanga’n a kaihruai a, Project Director Pu HVL Zarzoenga’n DAY NULM nih phung tlangpui a sawifiah a ni.
