Nimin 6.1.2015 khan Chief Secretary Pu Lalmalsawma hovin Secretariat Conference Hall, New Secretariat Complex-ah State Level Empowered Committee an thukhawm.
Meeting-ah hian Union Cabinet in a lo pawm tawh, nikum September 16 a hman tan Shyama Prasad Mukherji Rurban Mission (SPMRM) chungchang an sawiho va. He mission thar hmang hian thingtlang khaw inhnaih te te cluster village te lakhawmin a changtlung thei ang bera chei that a tum a. Sawrkar laipuiin thingtlang khuate tihhmasawnna atana hmalakna Provision of Urban Amenities to Rural Areas (PURA) a lo kalpui tawh atanga a tha lai thur chhuakin SPMRM hi a siam a ni. He mission thar kalpui a nih chhung hian India ram pumah cluster 300 thlanchhuah tur a ni a, a thawhkhatnaah cluster 100 thlan chhuah phawt tur a ni. State tin atangin cluster villages thlangin chung zinga village pakhat chu Growth Centre atan hman a ni ang a. Growth Centre chhehvela khaw hnai tak takte chu he hmalakna thar hnuaiah hian rin luh an ni dawn a ni.
Cluster Village leh Growth Centre thlang chhuak tur hian sawrkar laipui Ministry of Rural Development chuan tehfung chi hrang hrang a siam a. Chung tehfung atanga teha tling te, hma sawn zel tura theihna nei nia langte chu SPMRM a telh tur hian State Sawrkarin sawrkar laipuiah rawtna a thehlut dawn a. Rawtna hi January ni 10 ral hma ngeia thehluh tur a ni.
Chief Secretary hova thukhawm State Level Empowered Committee chuan Growth Centre atana thlan chhuah zingah Aibawk chu ngaihpawimawh bera dahin Thingsulthliah leh East Lungdar ten an dawt a ni. Sawrkar laipui Ministry of RD chuan tehna hrang hrang hmangin an lo teh ve leh hnuah heng khaw pathum zinga pakhat hi an thlang chhuak dawn a ni.
He mission in a tum ber chu India ram State leh UT tina cluster village tihhmasawn a, entawn tlak khawpa siam leh chumi hmanga State leh UT ten chak zawka hmasawnna rahbi thar an kai theih chu a tum ber a ni.
Meeting-ah hian Finance, Planning, PWD, Health & Family Welfare, PHE, FCS&CA, Environment & Forests, Soil & Water Conservation, School Education, ICT, Horticulture, UD & PA, Agriculture, Social Welfare, LAD, P&E, RD, SIRD, State Planning Board, MzSRLM atangin Secretary, Director, Adviser leh CEO-te bakah District tin atanga DC leh Project Director-te an tel a ni.
