Chief Executive Member, Mara Autonomous District Council leh MADC-a a thawhpui te;
Deputy Commissioner leh Siaha district chhunga sawrkar hnathawk zawng zawng te;
Siaha khawpui leh Siaha district mipui zawn zawng te; India Independence Day 2024 Chibai ka buk a che u. SAMAW.
Vawiin a Independence Day vawi 78-na kan lawm hian India ram tana zalenna sualtu zawng zawng te zahna chibai kan buk a. Zalenna hlut zia kan hriat thar leh theuh a pawimawh hle.
Ram zalen ni turte, mahnia inrelbawl thei turte hian mi nu leh mi pa, thalai leh kumu pa lam thlengin mi tam takin nunna thap in an lo sual chhuak a. Hotu bera an neih Mahatma Gandhi phei chu India Hnam Pa, Father of the Nation, ti hialin a hming kan chawimawi zui ta zel a ni.
Mizote zingah ngei pawh Lalnu Ropuiliani te, Khuangchera te chu sap mingo min awp tum tute lo beih let kawngah an hming tha hle a. Nunna hial an chan phah a nih kha.
Ram leh hnamin zalenna kan hmuh te chu hre ve pha tawh lo mahse vawiin ni a dinhmun awhawm taka kan lo din theihna chhan hi anmahni vang a ni tih kan hriat thar a tha hle awm e.
Kan thenawm ram Myanmar, Bangladesh, Pakistan leh Sri Lanka te chu ram inrelbawlna kawng te, economy a tlakchhiat avang te leh harsatna hrang hrang avangin an buai hle.Heng thenawm ram te han thlir hian India khua leh tui kan nih avanga kan vanneih zia a chiang lehzual viau a ni.
Vawiin niah hian a bik takin he hun hlimawm tak hmang tura lokal zirlaite a bik takin ka fuih duh che u a ni.
Tunlai khawvelah thiamna a sang tawh hle a. Science leh technology a hmasawnna te hian min pawt dawr dawr a ni ber mai e. Heng hmasawnna leh changkanna leh awlsamna lo thleng te hi a tha zawngin hman theuh I tum ang u. Zirtirtu leh kaihruaitu tha neilo tan pawh internet kaltlangin zirtirtu tha ber ber te classroom a chhim theih ta.
India rama zirna in tha ber ber IIT, IIM leh University tha hova zirtirtu tha ber te zirtirna pawh hmun kilkhawr tak atang te pawhin chhim theih a lo ni ta hial mai. Thangtharte tan zirtirtu tha ka nei lo tih chu mahni inthiam chawpna tawngkam atan a tling lo chho viau mai.
Kumin chhunga sawrkarin kan district chhunga zirna chawikan nana a senso pawh hi a namai lo hle. Thil pathum chauh han tarlang ila:
Free School Uniform Grant atana senso hi Rs.55,37,400/- a ni a, Free Text Book pawh Elementary School zirlai 8,408 te hnenah sem a ni tawh a,
Mid-Day Meal dawng pawh hi Elementary School 202 lai an ni a. Hengte hi chu a tlangpui ang lek a ni.
Sawrkar-in zirna atana sum a sen te leh information & communication technology a hasawnna thlir hian mi tumruh leh huaisen, taima tak tan chuan hlawhtlinna kawng hi a inhawng zau takzet a ni.
Kum tin MCS, MPS, MF&AS leh MIS combined exam result a chhuah apiangin khel lovin Mara nula/tlangval hming a lang deuh zat zat a. Hei hian zirna kawngah kan theuneu loh zia a tilang chiang hle. He kan hmingthatna chhunzawm zel tur hian vawiin a lo kal zirlaite tan la zel turin ka fuih duh che u a.
Zirna leh thiamna hmangin Mizoram awp ngei I tum tlat ang u.
Mizoram sawrkar tharin thlai thar chi li sawhthing, hmuhphiah, hmarcha leh aieng te kan lei tur thu kan lo sawi tawh a. A taka tih hlawhtlin ngei pawh kan tum zel dawn a ni.
Heng thlai chi li chauh lo pawh kuthnathawktute tana hlawkpui theih tak tur eizawnna chi hrang hrang a awm nual mai. Chung zinga pakhat chu silk pangngang khawi hi a ni awm e. Tunah hian Siaha district chhungah Muga Silk Industry Development Project hmangin khaw 21 a chhungkaw 400 in silk pangang khawi turin hma an la mek a. Sawrkar tha chakna ringin an hlawhtlin ngei kan beisei tlat a ni.
Sawrkar tharin Bana Kaih Policy kalpui dan tur a duang chho mek a, Siaha district thalaite leh mahni kutkawiha eizawnna kawng daptu ten kan ngaihven a, chhawr tangkai ngei kan tum a tul hle.
Heng mai bakah hian central sawrkar scheme kal lai NREGS, PMKSY, Rural leh Urban Livelihoods Mission leh scheme hrang hrang hmang tein mipui ten hmasawnna rualkhai zawk an dawn theihna turin sawrkar hnathawkte pawhin harsa zawkte tanpui duhna tak tak nen hna I thawk zel ang u.
Kum 2021 pakhat atangin Myanmar tualchhung buai a intan a, a tawp mai a rinawm rih lo hle. Myanmar atanga sahimna zawnga lo lut zohnahthlak te dawnsawn dan kan thiam hle in a hriat a, kan chhunzawm zel a pawimawh hle.
Home Department lam pawh thawktu indaih lohna nasa tak karah mi leh sa leh thildang mamawh phuhru turin hma kan la chho zel a. Ramri leh ramchhungah ralmuanna a awm theihna turin hma lak zel kan tum tlat ang.
Khua leh tui ten hriselna tha an neih theih nan a changtu Health & Family Welfare Department a thawktute pawh rim takin an thawk tih kan hmu thei a, a lawmawm hle. TB leh HIV positive enkawl leh a vei hmuhchhuah kawngah te, tlang hri leng ven kawnga kan thawh that zia report kan lo hmu a, a lawmawm hle mai.
Kumin chhungin kan district-a nau piang awm zawng zawng 242 zinga 97% te chu damdawi ina piang an ni te hian thawktute thawhrim zia a tichiang hle. Inkalpawhna, inenkawlna khawl tha leh thil dangah harsatna nasa tak kan neih avangin nausen 41 kumin chhungin kan chan tih erawh chu a hriat a hrehawm hle. Nu naupai lai leh nausen enkawl kawngah zirtirna tha leh an mamawh hriatthiam puina (awareness tha) kan mamwh hle tih a lang awm e.
Tunlaiin aikal lak tihtawp chungchang a lar hle a. Tun sawrkar chuan Mizoram a sawrkar hna tha zawk, chak zawk leh rintlak zawka thyawh a nih theihna tur a nih ngei kan ring a. Kum reilote hnuah rah tha tak a la chhuah ngei kan beisei tlat a ni.
Aw le, sawrkar Department hrang hrang leh hnathawktute thawh that zawng zawng vawiinni hian kan tarlang vek seng loving a, an zavaia chungah erawh chuan lawmthu ka sawi thar duh a ni.
Siaha khawpui leh Siaha district nuam, ralmuang leh hmasawn tak kan nih theihna turin bang bik kan awm lo tih hre thar theuh ila. Kan hma zawn theuhah dikna, rinawmna leh huaisenna nen, Pathian rinchhan tlat chungin, taima takin I thawk theuh zel ang u.
Ka lawm e!
CHALY KAW SI!
