Vawiin chawhma dar 10:00am khan Government Higher Secondary School, Siaha-ah 33rd Eye Donation Fortnight Programme hman a ni a.

Vawiin 33rd Eye Donation programme hi  Dr. Lalparliani, CMO, Siaha chuan  kaihruaiin,  khuhhawnna thu  sawi a nghal a. Dr.Lalparliani chuan midangte tan malsawmna ni tura Bible in min zirtir angin, Mit kan donate hian Midangte tan malsawmna kan ni thei thu zirlai te a hrilh a. India rama Mit donate hmasa bertu chu India Prime Minister hlui Rajiv Gandhi leh Miss World Aishwarya Rai te an nih thu a tarlang bawk.

Dr. C. Hnichho pawhin thusawina hun hmangin, Mit Donate a pawimawh zia leh a hlauawm lo zia zirlai kalkhawm  te  hnenah hrilhin; Mit Donate han tih  hluai ai mah hian Cornea Donation tih ila tun ai nasa hian Mit donation tih duh an tam a rin thu a sawi chhuak bawk.

Vawiin programme hmanah hian Siaha District  atanga an thi hnuah Mit Donate tu tur  Pi. Lalvuli, ECM Vaih leh Pi. Awsi, Chakhei chhungte hnena  Donor Certificate hlan nghal a ni a.

He hunah hian GHSS Lecturer, Miss TT.Duhtinthluaii pawhin thusawina  neihin,  Zirlaite chu mit donate vek turin a fuih a, Isua Krista in nunthar kan neih theih nan a nun a hlan a, keini pawhin mitdel ten khaweng an hmu ve thei nan kan mit kan hlan hi a Isua hnung kan zuina pawimawh tak a ni, a ti.

He hunah hian Lalneihkimi Chozah in  Thi hnua mit donate tura intiamkamna  Pledge Form hrilhfiahna  hun a hmangin;  Pledge form hi GHSS Zirlai naupang te zingah semchhuah nghal a ni a.  Zirlai naupang  71 in he Pledge  form hi an fill up nghal a ni.

Eye Donation Fortnight Programme hi nasa zawka Siaha District a hman zel tum a ni a.  College, DIET leh Higher Secondary School  dangah te pawh he programme he hman zel  tum a ni thu tarlan a ni.

Mipui zing atanga Mit donate duh an awm chuan  MCHP Building-ah  office kal ni zing dar 10:00 a.m  atanga tlailam dar  1: 00 p.m inkarah  office engtik lai pawha  ngaihven/ in  register  thei reng a ni, tih National Programme for Control of Blindness and Visual Impairment te chuan an tarlang bawk a ni.