No.3821/2021-2022

Aizawl  26th January, 2022 : Mizoram hmun dangte rualin Siaha District-ah pawh tukin dar 9:00Am khan Circuit House kawtah, khuallian Pu Kesavan R, IAS, District Bawrhsap hovin Covid-19 inkaihhruaina dan zawm chungin 73rd Indian Republic Day chu urhsun taka hman a ni. Republic Day Celebration Committee in a lo rel tawh angin, Covid-19 hrileng avangin kumin Republic Day-ah zirlai naupang leh mipui mimir tel lovin, Head of Office-te leh sawm bik mi tlem te ten an hmang a ni. 2nd Battalion MAP ten Khuallian hi Guard of Honour zahna an hlan a ni.

Khuallian chuan thu sawiin Republic Day vawi 73-na a lo thlen hian Siaha district mipui te duhsakna chibai a buk a. Republic Day hi India Danpui ‘Constitution of India’ chu India mipui ten mahni tana kan inpek ni leh hman tan ni January 26, 1950 hriatrengna puala hman thin a ni, a ti a. Dan ang thlapa rorelna kalpui leh ramchhunga chengte chu intluktlanna dan hnuaia leng za kan nihna tichiangtu Indian Constitution hman tan ni a nih avangin India ram khua leh tuite tan hian a hlu reng a ni, a ti bawk. He danpui hian India ramah milian leh mite thlei bik nei hauh lo leh sakhaw hrang hrang bakah hnam nunphung inang lo tak takte zai khata luang za tura min hrutrualtu leh min khaikhawmtu a nih vangin a hlu em em a, khawvel huap pawha mipui duh thlan leh rorelna ram nuam leh ralmuang kan nihna lantirtu pawimawh tak a ni bawk, a ti.

Khuallian chuan thu a sawi zelnaah India ramin chona leh harsatna tam tak a paltlang tawh a, hetiang hun harsa a tawh lai pawhin ram mipuite inlungrualna leh theihtawp chhuaha hrui khat vuana hmalam an pan tlan thinna chuan rah duhawm tak chhuah zelin harsatna leh chona an tawn ang angte an hneh theih pha thin a ni, a ti. Tuna hripui kan do mek Covid-19 kan hmachhawn danah pawh mipuite an inlungrualzia a langchiang hle a, harsatna tam tak an hmachhawn a, sorkar, Kohhran, NGOs te leh mipuite tanrualna a ropuiin he hripui dona kawngah milian leh mite inthleina awm hauh lovin theihtawp chhuah tlanna zarah Covid-19 vei pawh enkawl dam ni zelin a hri leng darh zau zel tur pawh theihtawpin ven theih zel a ni, a ti. Heng zawng zawng a thlen theihna chhan chu thawktu leh mipuite tanrualna vang a ni a, thahnemngai taka hma kan lak zui zel pawh a duhawm takzet a ni, a ti.

Khuallian chuan vawiin Republic Day lawmnaah hian Covid-19 dona kawnga ral hmatawnga ding – Health department, Police force, MADC department hrang hranga thawktute, DDMA & staff-te, Village Task Force-te leh Tlawmngai pawl hrang hrangte bakah Political party hrang hrang aiawhte, Kohhran hrang hrang hruaitute hnenah lawmthu sawiin Covid-19 dona kawnga mimal, pawl, khua leh veng inphal tak tak Siaha district-in a nei hi a ropui a tih thu leh thinlung takin a chhuan takzet thu DC hian a sawi bawk a ni. Hmalam hun hmachhawn turah pawh inlungrualna hi i vawng nung zel ang u, tiin Siaha district mipui zawng zawngte a sawm bawk a ni.

Khuallian Pu Kesavan R. chuan sawrkar hmalakna langsar zualte tarlangin Socio-Economic Development Programme (SEDP), Agriculture Department hnuai atangin heng khua Laki, Khopai, Ahmypi, Zyhno, Siaha leh Lôbô khuaah te 200 acres azau a vaimim chin a ni a, Bekang (Soyabean cultivation) pawh 75 Acres lai hmalak a ni bawk. PMKSY hnuaiah Construction of Secondary Storage Structure and Water Harvesting Structure kum tin kalpui niin kum 2021 chhung khan 20 ve ve hmun hrang hrangah siam a ni bawk. NFSM (National Food Security Mission) hnuai atangin cluster demontration on Maize, Sorghum and Rice pawh khaw thlan bikah te kalpui a lo ni tawh bawk a, RIDF hnuai atangin Siasi-ah 20 Ha, Pala-ah 20 Ha leh Lopu-ah 10 Ha Wetland Rice Cultivation tih zauh a ni bawk.

SEDP, AH&Vety Department hnuaiah kum 2019-2020 khan Rs.3,68,580.00 mi 90 te hnenah Vawk leh Ar vulh bultan nan pek an lo ni tawh bawk.

PHE Department hnuaia Jal Jeevan Mission kaltlangin khaw 13 a household 1968 te hnenah Household tap connection vuahsak an ni tawh a, 1000 units of individual Household latrine, 21 units of community sanitary complex bakah 51 units of Plastic waste collection centre siam a ni bawk.

Power & Electricity Deptt enkawl lai 33 KV Sub-station 6 kaltlangin chatlak lovin 13,138 consumers chawm mek an ni a, Renovation of Tuipanglui Small Hydel Project, kum 2011 september a leimin avanga chhe tawh pawh Rs.300 lakhs hmanga cheibawl that mek a ni a, 80% hnathawh zawh tawh a ni. PWD ten PMGSY hnuai atangin 48.15Kms kawng siam a ni tawh a, Rs.6618.07 lakhs lai senral a ni tawh bawk. Fisheries deptt hnuaiah Sangha chi 3,00,000 lai semchhuah a lo ni tawh bawk. DCSO Deptt hnuaiah chhungkaw 17395 ration card siamsak tawhin, chung zing atang chuan chhungkaw 14533 te chu Aadhar card nen thlunzawm tawh niin, Mid-day meal pawh Primary school 139, Middle school 89 te bakah Anganwadi Centre 115 te hnenah semchhuah an ni.

Horticulture deptt hnuaiah kum 2020-2021 chhungin MIDH programme kaltlangin thlai chi hrang hrang 110Ha khaw hrang hrangah semchhuah tawh a ni bawk. SEDP hnuai atangin Dragon Fruit, 2021 atangin kalpui tan a ni a, an mamawh hrang hrang bakah Rs.12 lakhs hmanga hmalak tan a ni tawh bawk. Social Welfare & Tribal Affairs Deptt hnuaia programme National Assistance Programme kum 2020-2021 chhungin monthly pension 1422 te hnenah pek niin, lump sum financial assistance under National Family Benefit Scheme hnuaia mi 18 te hnenah pek an ni bawk. Stipend to Differently Abled Students, pre-matric students 100, hengte atang hian 52 primary school students ten Rs.360/- per annum, 33 middle school students ten Rs.480/- per annum bakah 15 High School students ten Rs.1020/- per annum an dawn tawh bawk. Covid Care Package pawh Senior citizens 300 te hnenah pek an lo ni tawh bawk. Covid Care Relief, Buhfai leh Dal pawh persons with disabilities 64 te hnenah sem a ni bawk.

Health& Family Welfare Deptt hnuaiah Covid-19 mi 53187 test tawhin (49974 RAgT, 3213 TrueNAT), positive 5885 hmuhchhuah a ni a, Covid-19 avanga boral zat 20 awm tawhin, Vaccine total 1st dose 37143 leh 2nd dose 26326 ten an la tawh bawk a ni.