No.3820/2021-2022

Aizawl 26th January, 2022 : India Republic Day 2022 chu vawiin chawhma dar 10:00 khan Hnahthial Ground thar HBSC Ground No-II-ah sawm bik mi tlemte te nen hman a ni a, Hnahthial District Bawrhsap Pu R. Lalremsanga chu khuallian niin Hnam Puanzar a pawt parh a, Hnahthial Police te Guard of Honor pek a chhanglet a ni.

Khuallian Pu R. Lalremsanga, District Bawrhsap chuan thu sawiin Hnahthial District mipuite chibai a buk a, India ram chuan British Sorkar tangin 15th August, 1947 khan zalenna a hmu a, ram chhung inrelbawlna tur dan Indian Constitution chu Dr. B.R. Ambedkar chairman na hnuaiah Drafting Committee buatsaihin peihfel a ni a. 26th January,1950 ah Indian Constitution hi hman tan niin he ni pual hian India zalenna sualtu zawng zawngte zahna chibai a buk thar leh tih a sawi a, Hnahthial District chu district naupang te ni mah ila kawng hrang hrangin hma kan sawn a, tun hnaia Electoral Roll tlangzarh takah Hnahthial District chhungah vote nei thei mi sing hnih sang hnih za sawmhnih pathum (22,123) kan awm mek a, kan vaiin Hnahthial District chhungah mihring sing thum sang thum za hnih sawm kua (33,290) kan awm mek tih a tarlang bawk.

Bawrhsap chuan Hnahthial District department hrang District Administration; District Police Force (DEF); Health & Family Welfare; Social Welfare & Tribal Affairs; Environment, Forest & Climate Change Department; Public Works Department; Public Health Engineering Department; Power & Electricity Department; Agriculture Department; Horticulture Department; Sericulture Department; KVK, Hnahthial; AH&Vety Department; Urban Development & Poverty Alleviation Department; Rural Development; Education; District Research office, Economics & Statistics Department hmasawnna leh hnathawh hrang hrangte a tarlang a, Mizorama Agriculture thiamna zir theihna awm chhun tun hmaa Integrated Training Centre (ITC) tih chu sorkar in ti changtlungin School of Agricultural Science (SAS) a hlang kaiin Certificate Course zirna chauh ni thin khan Diploma Course a ni ta, a lawmawm hle a, cheng nuai za sarih (Rs. 700 lakhs) sengin hmasawnna hna thawh mek a ni a ti. Higher & Technical Education hmasawnna pawh sawiin Govt. Hnahthial College chu tun hnaiah India ram pum a College leh University that dan endik tu National Assessment and Accreditation Council (NAAC) in an endiknaah Accredited 'B' Grade pek an ni a, kan lawmpuiin kan chhuang tak zet zet a ni a ti bawk.
Hnahthial ti hming tha tu zirlai HSLC examination hnuhnung bera 8-na Jonathan Lalhruaitluanga leh MSW Gold Medalist H. Lalvenzuali chawimawi a ni a, Daily News Paper-a Faina ziak tha Kailawn Daily Newspaper Editor Pu VL. Liansanga hnenah chawimawina leh lawmpuina hlan a ni.

Hnahthial khawpui chhung Veng Fai inelna lawmman sem niin pakhat-an Model, 2-na Chanmari leh Pathumna Bazar te an ni. Office Fai lawmman pawh sem niin 1-na KVK, 2-na DEO leh 3-na DEF (SP Office) te an ni. School Fai lawmman pawh sem niin Primary School-ah 1-na Govt. Primary School-IV, Middle School-ah Govt. Indira Memorial School leh High School-ah Govt. High School Hnahthial te thlan a ni bawk. Hnahthial District chhung thingtlang khaw fai inelna lawmman pawh sem chhuah niin 1-na chu Khawhri a ni a, 2-na chu Chhipphir niin 3-na chu Denlung leh Rotlang East khuate an ni.