611/2025-2026
Siaha the 15th May 2025: Siaha District Disaster Management Authority (DDMA) hmalaknain vawiin chawhma dar 11:30 khan Govt Higher Secondary School, Siaha-ah van sang atanga beihna (Air raid) mock drill neih a ni.
Mock Drill-ah hian vansang atanga beihna (Air raid) awm anga lantir a ni a, Thlawhna atanga beihna thleng anga lantir a nih rual hian siren tihrik nghal niin zirlai naupangte chu classroom chhunga hmun him laiah an tawm a, zirtirtuin theihtawpa thlamuanin hliam tuarte a buaipui chhunzawm a ni. Hun reilote hnuah Quick Response Team (QRT) leh Fire Department-te, Health Department leh Police lam ten a hmun hi thleng chhunzawm nghalin hliam tuar lem changte an bawihsawm nghal a, Ambulance hmangin District Hospital, Siaha lamah phurh zel an ni.
Siren a rik zawh rual hian zirlai naupangte chu zirtirtuten hmun himah an hruai chhuak a, thuneitute thu leh hla ngaichang reng chungin school tualzawl hmun himah an tawm a ni.
Mock Drill neih zawh hian a hmuna enpuitu District Bawrhsap Pu VL Hruaizela Khiangte chuan zirlaite hmaah chuan ceasefire agreement bawhchhiatna a awm thu te a tarlang a, Siaha District chu Bangladesh leh Myanmar Ramri a awm anih avangin inralrin reng a ngai a, vawiina buatsaih tak mock drill chu ngaih pawimawh a tul hle a ni, a ti.
Tarlan tawh angin Mock Drill hi Ministry of Home Affiars, Govt of India thuchhuak anga buatsaih a ni a, India leh Pakistan inkar boruak tha lo avanga inralrin reng a tul tih thuah District tinah buatsaih tura thuchhuah a ni.
