3105/2024-2025

Dated Siaha, 20th November 2024: Vawiin chawhma dar 11 khan District Industries Conference Hall, Council Vaih-ah kum tina hman thin All India Cooperative Week vawi 71-na kharna hun hman a ni. He hun hi Pu Beirahmo Syhly, Executive Member i/c Co-operative department, etc. MADC chuan khuallian niin a hmanpui. Kumin Cooperative Week theme chu “Role of Cooperatives in Building Viksit Bharat” tih a ni.

Khuallian Pu Beirahmo Syhly chuan cooperative society tha nei tur chuan taimakna, rinawmna a pawimawh a ti a, mimal ni lovin pawl anga hmalakna a nih avangin inlungrualna tha neih a ngai tiin tanpuina dawn duh avanga society din chu a tlo lo va, sawrkara in register si hmalakna sawi tur nei lo pawl nih chu a zahthlak thu a sawi.

Pawl hmasawn chak tak ni turin hruaitu inpe, hlawkna um lo, thahnemngai taka thawk mi an awm a ngaih thu khuallian chuan sawiin, pawlah chutiang mi an tam phawt chuan society hlawhtling tak a nih thin thu a sawi. Hlawkna um ringawta pawl din chuan rei a daih thei lo a, Society-a member te chuan an pawl thil tumah an chian a ngai a, hruaitute a theih ang anga an dawmkan fo a tul tur a ti bawk.

Cooperative society enkawltu sawrkar department leh district union hruaitute pawh thawhhona tha tak neih a ngaih thu sawi langin, insiamthat leh insiksawi ngaihna lai a awm chuan insiamthat hreh lo turin leh, ram mipui hmakhua ngaiin theihtawp chhuah a tul a ni a ti bawk.

Pi Lalbiaknii, Manager Mizoram Cooperative Apex Bank Saiha Branch chuan report pein Siaha khawpui chhungah Apex bank pakhat awm mekin, Board of directors meeting in an remtih angin New Colony-ah branch thar hawn a nih tur thu a sawi bawk. Sawrkar kum kal mekah September 2024 thleng khan Pawisa dahluh (deposits) - ₹72,95,16,262.99, Loan pekchhuah ₹79,49,29,292.53, Hlawkna (Profit) - ₹2,72,62,442.64 an neih thu leh loan atana pekchhuah hi Agriculture, Housing, Biak In, Business, Personal loan a ni tih a tarlang.

Pu Joseph Lallungmuana, Manager Mizofed. Ltd. Siaha-in tun dinhmunah Siaha khawpuiah gas a thlen that thu sawiin nikumah Mizofed atangin Gas cylinder ₹8,79,62,706.36 man hralhin, gas equipment (lighter, pipe, adt.) hralhna atangin ₹2,39,834.00 an hmu tih a sawi bawk.

Pu K. Mara, President, Siaha District Cooperative Union chuan hun a kaihruai a, Rev. Thylua Hlychho chuan hunserh hmangin Pu. N. Lalhmingmawia, Executive Officer (EO) SDCU, Pi N. Maki, Deputy Registrar, Cooperative Societies (DRCS) MADC, Siaha leh Pu J. Lalthianghlima, CEI hnen atangin thusawi ngaihthlak niin Pu Beichhuatha Hlychho, BOD, SDCU in lawmthu sawina neiin hun tihtawp a ni.