No.3291/2020-2020

Siaha; July ni 21: Vawiin chhun dar 12:00 noon khan District Hospital Conference Hall-ah ART( Anti-Retroviral Therapy) Centre hawnna programme hman a ni. ART hawnna programme hi Dr. C. Lalrosanga, DMS in kaihruaiin, Pu Bhupesh Chaudhary IAS, district bawrhsap chuan Khuallian niin ART Centre hawnna programme hi a hmanpui bawk.

Vawiin programme-ah hian Khuallian Pu Bhupesh chuan thu sawiin Siaha district in health infrastructures lamah zawi zawiin hma kan sawn hret hret mek zel a, tunah hian Truenat khawl pawh lo thleng tawhin a bunfelna tur buaipui mek a ni. Mizoram district a Mobile Medical Unit kalpui theih awmchhun kan ni mek a, kuminah pawh hian CSR atangin Ambulance thar kan dawng leh tawh a ni. Tunah ART Centre kan han neih leh te hian HIV/AIDS damlo enkawlna kawngah hmasawnna rahbi thar kan kai dawn a ni. kan HIV +ve patient ten damdawi la tura Lunglei an pan a ngai tawh dawn lo a ni, a ti.

Pi Zingia Hlychho, Councellor,ICTC atangin ICTC hnuaia hmalak tawhna leh hmachhawp te report ngaihthlak a ni bawk.

Dr.Richard, Epidemiologist,MSAC, Aizawl pawhin thu sawiin; India ram pumpuiah nikum financial year-ah khan ART 50 din tura ruahman a ni a, 50 atang hian Mizoram in 2 kan chang ve a, chu chu Siaha leh Serchhip ART te hi a ni.

ART(Anti-Retroviral Therapy) hi HIV +ve te enkawlna damdawi a ni a. HIV hrikin taksa a khawihchhiat tur a control bakah, midang kaihchhawn theihna a ti tlem a ni.

Dr.C.Hnichho, CMO in lawmthu sawina hun hmangin vawiin programme hi a khar ta a ni.