No.3292/2020-2020

Law & Judicial Minister Pu T.J. Lalnuntluanga chuan a bial chhung Champhai South a fankual zawh hnuah vawiin khan tunhnai lirnghing tum engemawzahin a tihbuai mek East Tuipui bial chhung khaw hrang hrangte a tlawhkual tan. Minister leh amah tawiawmtu District Official leh khawtlang hruaitute hian vawiin hian Leisenzo, Leithum, Dungtlang, Samthang,Vaphai leh Farkawn khuate tlawhin Village Level Disaster Management Committee te leh khawtlang hruaitute meeting neihpuiin chhawmdawlna thilpek an hlan a, pipu sulhnu pawimawh tak lirnghingin a nghawng tel, Thasiama Seno neihna E.Chawngtui leh Lianchhiari lunglen tlang Dungtlang te pawh a tlawh bawk a ni. Naktuk hian khaw dangte an tlawh chhunzawm leh dawn a ni.

Law & Judicial Minister Pu T.J. Lalnuntluanga chuan lirnghing avanga mipuite thlabarna chu kan thlabarna a ni tih hriain sawrkar lamin a tul anga hma lain theihtawp a chhuah thu leh an thu ken pui ber chu chhiatawhnate hriatpuia, a tuartute thlamuan tura tlawh kual an nih thu a sawi a. A hmun ngeia kala thlamuan tura lo pen chhuak an nih thu sawiin, tuarte tawrhpuia inlenpuia, inhnem chu kan rawn ken hmanraw lian ber ani, a ti. Lirnghing a rawn thlen hriat anih ve leh State sawrkar hotu ber Chief Minister-in Sawrkar laipui hotu lu ber ber Prime Minister, Home Minister leh DONER Minister te biain thil awmzia a hrilhfiaha, a tul ang zela puih an inhuam reng thu an hrilh a ni, a ti a. Lirnghingin a tihbuai biala harsatnate buaipui kawngah bialtu MLA te'n theihtawp an chhuah mai bakah a hmun ngeiah ram hruaitu Minister leh MLA ten an tlawh a, Sawrkar lam atangin district administration, leilung lam zirmi mithiam bikte, Health Department thawktute, DM&R Team leh Psychologist rualte an lo feh chhuah tawh thu sawiin, hei hian sawrkarin lirnghing tuar khuate a ngaihven zia a lantir a ni, a ti bawk.

Pu T.J. Lalnuntluanga chuan a tul leh mamawh ang zelin district thuneitu leh State sawrkarin theihtawp a chhuah zel dawn thu sawiin, khuarel chhiatna thleng thinte a tihreh theih loh nain a tul ang zela hmalak ngaihna zawnah sawrkar leh Ministry a inhawn reng thu a sawi a. Khaw hrang hrangte mamawh thlente chu ngaihthlak sakin a tul anga bawhzui a tum thu a hrilh a ni.

East Tuipui biala khaw hrang hrangte tlawhkuala thang mek bialtu MLA Pu Ramthanmawia, Vice-Chairman, Bamboo Link Road Board chuan Champhai South bialtu MLA leh Law Minister ni bawkin East Tuipui bial harsatnate a hmun ngeia a rawn tlawh chu lawmawm a tih thu a sawi a. Hripui leh lirnghing vangin buai rih mai ila beidawng mai lovin kan ram leh hnam tan tiin theihtawp kan chhuah zel tur a ni, a ti a. Hun harsa tak takte Mizoramin a lo paltlang fo tawh thu tarlangin, hun khirh tak tawn mek laia Sawrkar leh Official te'n lirnghing tuarte an ngaihsakna, khawngaihna, duhsakna leh tanpui duhna avangin bial aiawhin lawmthu a sawi a ni.

Pu Rex Zarzoliana Vanchhawng, Champhai SP chuan Dungtlang Police Station ah SDRF Team Member 10 te dah an nih thu sawiin, kar leh chho hian khaw hrang hrangte tan chhiatrupna thlen thulh pawha chet lak dan tur inzirtirna neih tum a nih thu a sawi a. Rikrum thil hman mai theih tur mamawh zualpui dahna Emergency Kit chungchang sawifiahin, intinte chu Emergency Kit Siama kawl vek turin a chah a ni.

Lirnghingin a harsatna a thlen khawtlang hruaitute chuan Sawrkar hotute ngaihtuahna leh tawiawmna ah thinlung takin lawmthu an sawi a. Khawtlang anga thawhhona a that thu leh district official te ngaihvennaah lawmthu an sawi bawk a ni.

Law & Judicial Minister hian Village Level Disaster Management Committee te hnenah tanpuina sumfai bakah First Aid Kid, kum upa leh naupang zawkte tan chhiatrupna thlen thulha ei leh in mamawh turte a sem a ni. Minister hian tukin khan Champhai South bial chhunga inkalpawhna kawng siam that ngai Ruantlang leh Mualkawi inkalpawhna Km 2.5 a thui leh Kelkang leh Dilkawn inkalpawhna Km 1.7 a thui siam dan tur chu line department-te leh khawtlang hruaitute nen an enho bawk a ni.

Pu T.J. Lalnuntluanga hi Pu Rex Zarzoliana Vanchhawng SP, Pu R. Lalnghakliana, PD DRDA, Dr. Lallawmkima DIPRO, Er. J.Lalhmachhuana, EE, Project Project Division Champhai leh khawtlang hruaitute'n an tawiawm a ni.