No.3293/2020-2020

Aizawl the 21st July, 2020: Vawiin khan Chief Minister Pu Zoramthanga hovin Horticulture Department hotuten CM Cabinet meeting room ah bamboo development hmalakna te thlirhovin hmalak zel dan tur an sawiho.

He meeting-ah hian bamboo development atana hmalakna hmasa (pilot project) - Model Bamboo Plantation chungchang sawi a ni a. A tiak phai atanga chah chu nursery ah hardening tih laiin Lengpui leh Hmunpui a beneficiary te chuan a phunna tur thlawhhma siam leh a khur laih bakah tul dangte tih zawh vek a nih hnu in tunah hian a tiak an phun vek tak thu sawi a ni. Heng an phun zawng zawng (Planting material) hi a vaiin 79,200 a ni. Vawiin meeting-ah hian rua chinna karah thlai dang chin tel (mixed cropping) tih tum chungchangah a chingtuten rua thanna tur dip thei tur awm ang thlan loh a pawimawh thu sawi a ni bawk.

COVID-19 hrileng avanga thei leh thlai thartute leh a leitute inkara awlsam zawk leh hlawk zawka an indawr theihna tura inthlunzawmna, Fruit and Vegetable Supply Chain chungchang pawh he meeting ah hian sawi a ni a. Horticulture Department, Commerce and Industries Department leh MIZOFED te tanghova hmalakna hi chhunzawm zel la niin, June ni 19 atanga July ni 20, 2020 thleng khan thei leh thlai (zikhlum, tomato, samtawk, lakhuihthei, theihai) trip 15 supply tawh a ni a. Heng atang hian Zoram khaw hrang hranga kut hnathawktute hnenah cheng nuai 21 chuang a lut hman a ni.

Vawiin meeting-ah hian Horticulture Department changtu Addl. Chief Secretary Pu J.C. Ramthanga, Horticulture Department director Dr. Elizabeth Saipari leh department officer dangte an tel a ni.