2071/2026-2027

Siaha the 4th September, 2026: Vawiin khan DC Mini Conference Hall, Siaha-ah Asst. District Election Officer Pu Abraham Beirazi Khithie kaihhruaina hnuaiah Special Intensive Revision (SIR) 2026 kalpui mek chungchangah thutkhawmna neih a ni. He hunah hian Electoral Registration Officer (ERO), Assistant Electoral Registration Officer (AERO) te bakah Recognized Political Party aiawhte, NGO hrang hrang aiawhte leh Media mite an tel a ni.

Thutkhawm kaihruaitu Asst. District Election Officer Pu Abraham Beirazi Khithie chuan, meeting kohna ngai pawimawha kal khawmte chungah lawmthu a sawi a. Inthlan chungchang chu thil pawimawh tak a nih avangin theihtawp chhuaha tanrual a tul thu a sawi. Siaha District chhunga NGO hrang hrang, Political Party leh Media ten SIR  inbuatsaihna kawngah tha taka an thawhpui thin avangin lawmthu a hrilh a, karleh lama Final Roll tarchhuah turah pawh tawiawm chhunzawm zel turin a sawm bawk a ni.

Election Officer Pu Vabeimozachhi Chozah chuan Special Intensive Revision (SIR) 2026 kalpui dan tlangpui sawifiahna a nei a. Election Commission of India (ECI) thupui ber chu “No voter to be left behind” (vote nei thei zawng zawng e-roll a thun vek) a nih rualin vote nei thei lo roll a chuang tur venna kawngah pawh fimkhur a tul hle tih a sawi. Tun tuma Final Roll tarchhuah turah pawh theihtawp chhuaha fimkhur ni mahse tihsual palh awm thei a nih avangin, chutiang a awm a nih chuan kumtluanin Continuous Updation kaltlangin siamthat theih reng a ni tih a sawi bawk.

Special Intensive Revision 2026 kalpuina hnuaiah hian September ni 7, 2026 hian Final Electoral Roll tarchhuah tura ruahman a ni a, Siaha District chhunga Assembly Constituency pahnih 39-Saiha (ST) leh 40-Palak (ST) roll tarchhuah a ni dawn a ni.

Vawiin thutkhawmah hian zawhna leh chhanna hun hman a ni a, hriatthiam loh leh harsatna awmte sawifiahna hun hman a ni bawk.