1864/2023-2024

Dated Siaha 13th September 2023: India President-in ram pumpui tana 'Ayushman Bhav Campaign' hawnna a neih zul zuiin vawiin khan Siaha District-ah pawh Ayushman Bhav Campaign hawnna-chu DC Mini Conference Room-ah neih a ni a, Dr.K.Beichhua (MLA) chu khuallian niiin Campaign hawnna hi a nei.

Dr.K.Beichhua chuan hriselna lamah India ram chu khawvel huapin a hniam lo hle a, vawiina hawn tak Ayushman Bhav pawh hriselna lama ram mipuite hmasawnna thar thlentu tur pawimawh tak a ni tiin, Siaha District mipuite pawhin an hlawkpui dawn hle a, a taka hmasawnna awm turin theihtawp chhuah a kalpui a tul a ni, a ti. Ram changkang apiangah Health care ngaihpawimawh anih thu sawiin hriselna ngaipawimawh thar turin hmalak a hun tawh tak zet a ti. Ayushman Bhav Campaign-in a tum ber chu mipuite hnena Awareness thlen a ni a, mipuiten a hlawkna tak tak an hmuh theih nan mawhphurna neite theihtawp chhuah turin a fuih.

Siaha District bikah Healthcare Awareness lamah tan lak a ngai nasa hle nia a hriat thu sawiin Dr.K.Beichhua chuan Health Department-te kutah engkim dah theih a ni lo a, Department hrang hrang leh NGO-te nen thawhhona tha a awm a ngai a, lungrual taka district hmasawnna tura thawkho thiam turin a chah nghal a ni. Mipuiten hriselna tha an neih loh chuan hnathawk thei dinhmunah an ding lo va chu chuan nasa takin district hmasawnna a tithuanawp thin tih tarlangin district in kawng engkimah hmasawnna tha a neih theih nan Ayushman Bhav Campaign chu tha taka kalpui turin kalkhawmte a sawm a ni.

Dr. Lalnunziri, Sr. Chief Medical Officer chuan Ayushman Bhav Campaign nihphung leh kalpui dan tur tlangpui tarlanna a nei a. Ayushman Bhav Campaign chu hlawm lian tak tak pathum- Ayushman Apke Dwar 3.0, Ayushman Mela leh Ayushman Sabha-ah te then a ni a. Ayushman Apke Dwar 3.0 hnuaiah hian Ayushman Cards chu PM-JAY scheme hnuaia beneficiary tura thlan hamthatna la dawng lo te hnenah pek a ni dawn a, Ayushman Mela hnuaiah hian Weekly Health mela chu Medical College- ten an kalpui dawn a. Pediatrics, Surgery, ENT leh a dang ah te he Health Mela hi kapui tur a ni. Ayushman Sabha hi thingtlang leh khawpuiah ni 2 , October hian neih tura ruahman niin Healthcare scheme hrang hrang- ABHA IDs, sickle cells disease,TB patient identification, immunization leh a dangah te inzirtirna kalpui tur a ni ang.

Ayushman Bhav Campaign kalpui tha te hnenah hian Ayushman Gram Pachayat leh Ayushman Urban Award- te pek tur niin Ayushman Bhav Campaign hian September ni 17 atanga October ni 2, 2023 chhung a huam ang.

Vawiin hun hmanna ah hian 'Nikshay Mitra Award' hlanna neih nghal a ni a. Dr.K.Beichhua bakah Mizoram Rural Bank- Vaihpi leh New Siaha Branch te hnenah chawimawina hi hlan a ni a. Organ Donation Pledge-sawirualna neih ni bawkin chhangtu mi pathum an awm thei a ni.

Vawiin Ayushman Bhav Campaign hawnna inkhawm hi Pu Lalhmunsanga Hnamte District Bawrhsap chuan kaihruaiin Dr.S. Vabeilysa (Dy.CMO) chuan lawmthu sawina neiin hun a khar a ni.