4313/2024-2025

Siaha the 18th February 2025: Zofate Kut zinga pawimawh tak pakhat Chapchar kut, March Ni 7 a lo thleng tur lawm dan tur relin vawiin chawhnu dar 1 khan DC Mini Conference Hall, Siaha-ah District Bawrhsap, Pu VL Hruaizela Khiangte, District Chapchar Kut Committee Chairman kaihhruaina hnuaiah thutkhawmna neih a ni.

District Bawrhsap Pu VL Hruaizela Khiangte chuan kalkhawmte chu lawmthu hrilhin chibai a buk a, kum danga an hman thin dan report pe turin Prof Chawngkhuma Chawngthu, Secretary, District Chapchar Kut Committee a sawm nghal a ni.

Prof Chawngkhuma Chawngthu, Chhimtuipui Group YMA President chuan kum danga an hman thin dan report tawi a pe a, chipchiar zawka ruahmanna siam turin Sub committee din thin a nih thu te a tarlang a ni.

Vawiin thutkhawm chuan Kumin Chapchar Kut lawmna chu District playground, Siaha Vaihpi ah chawhma dar 11 ah neih nise a ti a, Kut Pa atan Siaha District Bawrhsap Pu VL Hruaizela Khiangte, Kut Thlengtu atan Pi P Chaki, MCHP Gen Hqrts President nise an ti. Kut hawnna hla nei tur te, hunserh hmangtu tur te, Hlado chham tur te bakah Chapchar Kut lawmnaa chanvo neitur hrang hrang, Hnam lam entir tur bakah mimal leh group zai tur te ruatfel an ni. Chapchar Kut lawmnaa announcers (comperes) atan Nula FC Lalrinkimi leh Pu Khusa Khaila te ruat nghal an ni.

Miss Chapchar Kut leh Mister Chapchar Kut thlang turin Maraland Video & Photographers Society (MVAPS) te mawhphurhna pek nise tiin Chai lam leh chhawnghnawh neih leh nise an ti a, programme chipchiar zawk duang turin sub committee an din nghal a ni.

Kumin Siaha District Chapchar Kut sub committee atan heng mite hi ruat an ni:

Chairman: Pu Abraham Beirazi Khithie, Addl DC
Co-chairman: Pu Vanlalchhuanliana SDO (S)
Secretary: Prof Chawngkhuma Chawngthu
Treasurer: Pu R Lalnghakliana

Anni bakah hian member tur te thlan nghal a ni a, sub committee te hian rel fel ngaite an rel nghal vek dawn a ni.