4312/2024-2025
Saitual the 17th February 2025: Lo/Huan/Leipui hal chungchanga Saitual Bawrhsap Dr. Lalngura Tlau chuan a hnuaia tarlan ang hian thu a chhuah:
Khua a lo thalin lo hal a lo hun leh dawn ta a. Lo leh huan kan vah bak ram kan tih kan thin avangin nungcha, thing leh mau leh mihring nunna hlu tak kan chan phah fo thin. Saitual District chhunga khaw hrang hrangah ram kang laka kan him theih nan a hnuaia tarlante hi zawm theuh turin mipuite hriattir kan ni:
1. Ram vat zawng zawngin meilam tha tak an siam ngei tur a ni a. An melam sial te endik a nih theih nan Lo/Huan/Leipui hal tur reng rengin an hal hma ni thumah VC-ah an in report vek tur a ni.
2. Khawtlang ram theh ram nei tute chuan March Ni 15, 2025 ral hmain lo an hal vek tur a ni.
3. Huan/Leipui tur mimal ram vatte chuan March Ni 5, 2025 hmain hal vek tur a ni.
4. Hmunphiah hmun nei te chuan March Ni 31, 2025 thleng an hal thei ang.
5. Lo/Leipui/Huan hal tur reng rengin an hal tur ram chhunga Electric wire, Internet Cable/TV Cable te a awm a nih chuan a buipuitute hnenah an hal hma ni thumah an hrilh ngei ngei tur a ni.
Sawrkar thupek dinglai zawm loa ram tikangtu dan anga hrem an ni ang.
