4311/2024-2025

Champhai, 18th February 2025: Vawiin khan Champhaia Chapchar Kut 2025 hman dan tur relin Chapchar Kut Organising Committee chu an Chairman Bawrhsap Pu VL Remliana hovin DC Conference Hall, Keifangtlangah an ṭhukhawm.

Pu VL Remliana chuan Chapchar Kut hlim leh lawm taka mipui ten an hman theih nan a huaihawttu ten rilru inhawng leh tihtak zeta an ngaihtuah a pawimawh thu sawiin,   Mizo hnam ziarang vawnhim nan te, thangthar ten Mizo nunphung an hriat theih nan te, kan hnam rohlu chawisan a, chhawm nun zel a nih theih nan te Chapchar Kut hi a pawimawh takzet a ni, a ti.

He hunah hian Chapchar Kut 2025 hmanna tura thil ṭul hrang hrangte sawiho niin hun hman dan tur uluk zawka duang turin Programme Sub-Committee din a ni a. Power supply, tui in tur, medical leh sanitation te pawh a buaipui turte tihfel nghal a ni bawk a, venhimna hna thawktu District Police-te puibawm  turin YMA te ruat ni se tiin an rel a ni.

Kumin Chapchar Kut hi March ni 7, 2025(Zirtawpni) chawhma dar 11:00 ah Zotlang Sports Stadium-ah hman ni se tiin Committee chuan a rel a. Kut thlengtu atan Pu F. Lalrinmuana, SYMA President ruat a ni a , Kut Pa atan Champhai District chhunga MLA te biak ni se ti a thu dah a ni.

Chapchar Kutah hian Kut Miss leh Mister thlan tur niin mipui nawlpui tel theihna tur Mizo infiamna chi hrang hrang te buatsaih tum niin, Mizo hnam lam chi hrang hrang thlir tur leh zaithiamte zai ngaihthlak tur a awm dawn a. Organising Committee chuan Chapchar Kutah hian mipui a tam thei ang ber tel turin a sawm a ni.

Vawiina Chapchar Kut Organising Committee- ṭhutkhawmah hian sawrkar department hrang hrang hotute, Sub-Headquarters YMA, Sub-Headquarters MHIP, District Headquarters MUP leh District MJA aiawhte an tel ani.