4310/2024-2025

Lawngtlai, 18th February 2025 : Chakma Autonomous District Council (CADC) huamchhunga Village Council (VC) inthlanna neih tur atana inbuatsaihna kal zelah vawiin khan Pu Cheemala Siva Gopal Reddy, IAS, District Election Officer (DEO) kaihruaiin a Office Chamber-ah Nodal Officer- ten  thutkhawmna an nei.

Pu Cheemala Siva Gopal Reddy, chuan kalkhawmte hnena lawm thu sawina a nei hmasa a. Chakma Autonomous District Council (CADC) ah Village Council (VC)  inthlanna hlawhtling tak awm turin Nodal Officer- ten mawhphurna lian leh pawimawh tak an nei tih a tarlang a. Nodal Officer- te chu anmahni hna chanpual theuh tha taka tihhlawhtling tura chahin, harsatna awm thei ang angte a hma lama DEO hriattir turin a chah a. Ralmuang leh zalen taka inthlanna awm turin DEO leh Nodal Officer ten theihtawp chhuah a tul hle tih sawiin, tha leh tluang taka VC inthlanna nei turin duhsakna a hlan nghal bawk.

Thutkhawmah hian Nodal Officer- ten an hna chanpual bika an hmalak tawhna leh hmalakna tur an neih ang angte tarlangin sawihona neih nghal a ni a. Nodal Officer- te chuan a hun taka engkim peihfel a nih theihna tur leh inthlanna tluang taka nei tura hma an lak tur thu an tarlang a ni.

Vawiin thutkhawmah hian Pu Zoramsiama Hmar, Asst. District Election Officer, Pu Collin Hlychho, Election Officer, Pu H. Zonunmawia, Project Director, Pi Margaret J. Vanlalremmawii, SDO(S), Pu Chinlianmanga, BDO, Sangau, Pu Gilbert Lalhlimpuia, BDO, Bungtlang 'S', Pu Lalnunpuia Renthlei, SDO (Civil) Chawngte, Dr. Saithantluangi Zote, SDC, Pi Malsawmtluangi, Superintendent, DC Office, Pu Zonunchama Ralte, DIPRO leh Pu R. Malsawmdawngliana Khawlhring, Programme Assistant, DRDO, te an tel thei a ni.