No.6525/2020-2021

Siaha, November 12 : Vawiinah District Child Protection Unit, Siaha leh Family Guidance & Counselling Centre (ECM), Siaha te buatsaihin Siaha District chhunga Department hrang hrang a thawktu Counsellor te pualin Counsellor's Meet 'Transforming Life Through Counselling' tih thupui hmangin DCPU Hall, Siaha vaihpi-ah programme hman a ni.

He programme hi Nl. Elicia, Superintendent, Siaha Observation Home in a kaihruai a. Pi Marry Laldikkimi, Commanding Officer, Salvation Army, Siaha chuan hunserh a hmang a, Dr. David Zaitinvawra, DCPO, Siaha District chuan Counsellor's Meet buatsaih a nih chhan sawifiahna hun a hmang a ni.

Mithiam thlan bikten thupui thlan bik chi hrang hrang hmangin kalkhawmte hnenah zirtirna an pe bawk. Rev. Danny Chozah, Director, Family Guidance & Counselling Centre (ECM) chuan Basic Principle of Pastoral Care & Counselling tih thupui hmangin zirtirna hun a hmang ve bawk a. Pi Lalawmpuii, Clinical Psychologist, District Mental Health Programme pawhin Dealing with issues in Physical and Mental Disorder tih thupui hmangin zirtirna hun a hmang bawk. Pu KT. Zachô, Project Manager, Women Anti-Drugs Association pawhin HIV/AIDS chungchang zirtirna hun a hmang ve bawk a ni.

Chawhnu programme hman chhunzawm leh niin, Pi Diana Hlychho, Counselor, Siaha Observation Home chuan Counselling with Children tih thupui hmangin zirtirna a pe a. Miss Merilyn MS. Mawii Beiho, Psychiatric Nurse, District Mental Health Programme chuan Alcohol and Substance Abuse tih thupui hmangin zirtirna hun a hmang ve bawk a. Huangzau taka sawihona hunte pawh neih nghal niin zawhna leh chhanna hunte pawh neih a ni bawk.

He programme-ah hian Siaha khawpui chhung atangin Family Guidance and Counselling Centre (ECM), One Stop Centre, Swadhar Greh, Agape Home, Calvary Healing Ministry leh Siaha District chhunga Children Care Institutions hrang hrang a thawktute an tel a ni.

Pi Malsawmtluangi Pachuau, PO, (IC) DCPU, Siaha chuan lawmthu sawiin vawiin programme hi a titawp ta a ni.