No.6524/2020-2021
Dated Khawzawl, the 12th November, 2020: Khawzawl District chhunga veng/khaw thenkhatah Village Level Task Force (VLTF) te'n Aizawl leh Mizoram chhung hmun dang atanga lo hawte lo quarantine-in, Covid-19 Free Certificate tel lo chuan an veng/khaw chhungah luh an phal lo thin tih hriat anih avangin Khawzawl District Bawrhsap Pu Zothanmawia, Chairman, District Level Task Force on Covid-19 chuan Khawzawl District chhunga VLTF te hriat tur inkaihhruaina hetiang hian a chhuah:
1. Mizoram chhung hmun dang atanga lo haw duhte chu Covid-19 vei emaw, rinhlelhawm emaw an nih loh chuan phalsak tur a ni.
2. Veng/Khaw thenkhatah Mizoram chhung hmun dang atanga lo haw/lut apiangte lo khunghran (Quarantine) emaw, Covid-19 Free Certificate lo phut zel hi thil tul a ni lo a. Covid-19 veite nena inhnimhnai emaw, rinhlelhawm emaw an awm chuan bialtu Zonal Officer/Magistrate-te hnenah thlen thuai tur a ni. Mahni thu a lo Quarantine emaw, Covid-19 Free Certificate lo dil/phut thin loh tur a ni.
3. Mahni khua/veng bil huamchhunga Lockdown puante, khaw dang atanga luh leh kal chhuah phal lohte hian khawchhung/vengchhung mai ni lo, a chhehvel khua leh veng a nghawnga, chu chuan District Administration thlenga nghawng tha lo a neih thin avangin Lockdown hi mahni khaw bil tan puan loh tur a ni.
4. Covid-19 vanga lockdown puan ngai ni a a lan chuan rang takin District Magistrate hnenah thlen hmasak tur a ni a. Medical lama mithiamte nen inrawn chung zelin, a tul a nih chuan ‘The Mizoram Epidemic Diseases (Covid-19) Regulations, 2020’ chhunga Regulation 11(1) in thuneihna a pek angin District Magistrate-in Containment Area ah a puang thei ang. District Magistrate thutlukna chu thu tawp a ni ang.
