Vawiin chawhma dar 11:00AM khan DC’s Conference Hall-ah Pi Harleen Kaur IAS, Siaha District Bawrhsap hovin District Level Co-ordination Committee an thukhawm. Vawiina DLCC thutkhawm hi Pi Harleen Kaur-i’n , Siaha District Bawrhsapa a awm hnua thutkhawm vawihnih a kohna a ni a, tum khatna chu ni 19/8/2016 khan neih a lo ni tawh. DLCC hi thlakhatah vawikhat zel thutkhawm tum a ni a, DLCC-ah hian Siaha District in hmasawnna rahbi thar a tuk thei nan Department hrang hrang te mawhphurna leh thawhho dan tur huangzau taka sawikhawm thin tur a ni.

Vawiin DLCC meeting-ah hian Siaha District-a Internet service chhe ngun lutuk te, Khawlaia Ui tam lutuk te, Side Drain chung chang te, kawngpui hnai/ nekchep lutuka mimal in sak chung chang te, Siaha District-in Pipe Band a nei ve lo chungchang te, Fur laia Phura leh Chakhei tlangdunga awm ten kawngchhiat avanga ei leh bar a harsatna an tawh thin chungchang te leh Office thenkhat Staff indaih loh chungchang te leh thil tam tak sawiho a ni.