3598/2023-2024

Dated Siaha 31st January 2024 : Vawiin khan Siaha District Level Committee on Myanmar Refugees- chuan DC Mini Conference Room-ah thutkhawmna an nei a, Pu Lalhmunsanga Hnamte, District Bawrhsap leh Chairman, District Level Committee on Myanmar Refugees-ni bawk chuan thutkhawm hi a kaihruai.

Pu Lalhmunsanga Hnamte chuan Siaha District chu Myanmar nen a ramri nei a nih avangin raltlan tan pan remchang ber pakhat a ni a, ramri pela lo lut pawh an tam hle a ni, a ti. Duh vang nilo in loh theih lohna vang zawkin raltan te an lo lut thin tih sawiin, mumal leh felfai zawka enkawl an nih theih nan District Level Committee on Myanmar Refugees chu din a ni, a ti. Raltlante lo enkawl kawnga theihtawp chhuah thintu Tlawmngai pawl, Kohhran leh mimal te chungah lawmthu a sawi a. Raltan lo lut an pun belh ve zel avangin leh ram mipuite him zawk nan uluk leh awmzia nei zawk a hmalak a tul hle tih sawiin, Siaha District- a lo him a, a ralmuan zel theih nan hmalak chhunzawm zel a ni a ti a. Mumal leh felfai zawka raltlan te enkawl annih theih nan Sawrkar, tlawmngai pawl, Kohhran leh mipuite thawhhona tha a tul hle a, lungrual taka ke pen ho zel turin a sawm bawk.

Vawiin thutkhawmah hian thu pawimawh tak tak ngaihtuahho a ni a. Myanmar lam atangin ruihhlo a bik takin damdawi number 4 a lut nasa tih pawmin, heng damdawi te hian thalai nunna a suat nasa tih pawmin ramri ah uluk leh zual a fimkhur a tul an ti a. Border- a duty mek Assam Rifles- ten hmalakna chak zawk an neih theih nan MTP, leh khawtina VC te bakah Mizoram Police- ten thawhhona tha zawk nei se an ti. Birth Certificate- pek chhuah kawngah fimkhur a tul hle an ti a, Refugees- nau neite chu Sawrkarin Birth Certificate- pe chhuak lo tura a tih angin a tul anga hmalak chhunzawm zel ni se an ti a. Birth Certificate -pek dawnah India khua leh tui diktak a ni em tih chu uluk zawka lo enfiah thin nise an ti bawk. Raltlan ten an hman uar ber pakhat Kenbo( two wheeler) chu khauh zawka khuahkhirh a tul an ti a. Registration- felfai tak siam leh lo enzui chu thil pawimawh tak a ni tih pawmin, sawrkar Official leh MTP lam ten chak zawkin hma lo la se an ti a. A bik takin Kenbo te chu Siaha khawpui bikah chuan tlan phalloh nise, khawhar kawngah pawh permit neite chauh tlan tir ni se an ti a ni.

Raltlan zingah ei leh bar lam tlachham an awm lohna turin theih ang angin hmalak nise an ti a. Tun dinhmunah Lopu leh Lomasu Raltlan camp- ten ei leh barah harsatna an tawk tan a, a hma lama Sawrkar hotute hnenah thlen nise an ti a. Raltlan lo luhbelh thei reng dinhmunah Siaha District- a awm avangin, lo in ralrin lawk ni se an ti . Raltlan Camp- a medical lam ten clinic an neih thin chu a tul ang zelin lo chhunzawm se an ti bawk.

Raltlan lo lut tharte zingah Registration mumal taka ti an awm lo tih chu pawmin, chak zawka hmalak a tul an ti a. Raltlan te chuan DC Office atangin ID la chhuak vek tawh se an duh tih sawiin, ID neilo te chu man chhuah zung zung nise an ti a. Ramri a khaw awmte an tangkai hle tih sawiin, Village Level Committee- te chu uluk leh chak zawka hma la tura tih nise an ti a. Tuna Raltlan lo awm nghet tawhte zingah pawh ID neilo an awm em tih chu dap chhuah nise an ti a ni. DC Office -atanga phalna nei te chauh District pakhat atanga District dang kal theih tih chu sawrkar dan ding lai mek a nih laiin phalna la lem lo a kal an awm thin tih sawiin, hemi kawngah hian chak zawk a hmalak a tul an ti a. Police leh MTP lam ten hma lo la se an ti a, sawrkar dan ding lai mek chu mipuite hnenah zau zawka puan darh nise an ti bawk. 

Raltlan Camp- ah dawr awm a tangkai hle tih chu pawmin khaw chhungah erawh chuan raltlan tan dawr hawn hi phalloh ni rih mai se an ti a. Tun dinhmunah khaw chhunga dawr hawng an awm nual tih sawiin, hemi chungchangah hian Trade License pe theitu MADC- lam te nen sawiho leh ni se an ti a. Raltlan te dinhmun an hriatthiampui hle tih sawiin chutih laiin a ram leilung fate himna chu thilpawimawh hmasa a ni an ti a. Raltlan leh ram leilung fate himna pek chu District Level Committee on Myanmar Refugees- te thiltum ber a ni tiin District Level Task Force pawh tul ang zel a hma la tura din ni se an ti bawk.

Siaha District-ah hian refugee camp- 41 awmin raltlan 6044 an awm mek bawk. Vawiin thutkhawmah hian District Level Committee on Myanmar Refugees- te an telkim thei a ni.