3597/2023-2024

District Level Narco Coordination Centre (NCORD) Committee, Champhai District chu vawiin khan an chairman DC Pu James Lalrinchhana kaihhruaina hnuaiah DC Conference Hall, Keifangtlangah an thukhawm.

Meeting Chairman Pu James Lalrinchhana chuan ruihhlo do kawngah nasa lehzuala tanlak a ngaih thu sawiin dan leh thupek kengkawhtute leh tlawmngai pawl hrang hrangte thawhhona tha lehzual neih a tul thu a sawi a. Tun hnaia India rama inthlan vuakveta venhimna thawk tha ber chawimawina leh Police station tha ber 4-na lawmman dawngtu Champhai Police an ni chu chhuanawm a tih thu a sawi bawk.

Vawiin meeting-a tarlan a nih danin nikum 2023 chhung khan Champhai Police-in ND&PS Act tlawhchhanin thubuai 134 ziak lutin mi 153 an man a, an zinga mi 54 te chu ram dang mi an ni. Kum 2023 chhung khan Heroin Kg 33.503 man a ni bawk a, hei hi kum 2023 chhunga Mizoram Police-in Heroin an man zawng zawng atanga chhutin za zela 53.13% a ni. Methamphetamine Kg 111 leh Gram 817 an man a, Solid Crystal Meth Kg 4 leh Gram 59, Ganja Kg 11.35 leh Alprzolam mum 450 an man a, Ruihhlo phurhna lirthei 30 man a ji bawk. Kumin January 2024 thla chhungin Champhai Police-te hian ND&PS Act hnuaiah thubuai 8 ziak lutin mi 11 an man tawh a, Heroin Kg 2 leh Gram 170 a rit an tawh bawk a ni.

Nikum November leh December thla hnih chhung khan Excise & Narcotics Dept Champhai chuan Heroin Kg 2 leh Gram 176, Methaphetamine Kg 22 leh Gram 220, Crystal Methamphetamine Kg 1 leh Ganja Kg 14 leh Gram 500 an man bawk a, mi 10-te chu an chhungte remtihnain Home-ah an dah lut bawk a ni.

Champhai Police leh Excise & Narcotics Dept-te hian nikum chhung khan tum eng emaw zat ruihhlo that lohzia inzirtirna chu zirna in leh kohhran hrang hrangah te an neihpui thu tarlan a ni bawk.

Champhai District NCORD Committee Member-te chuan Heroin a pung chho zel ni a lang chu nasa zawka tanlak a ngaih thu te, Department hrang hrang leh ruihhlo dotute information inpek that a ngaih thu leh thawhhona tha lehzual neih a tul thu te, uluk leh ngun zawka checking kalpui a tul thute sawiho niin a tam thei ang ber zirna in leh kohhranah ruihhlo that lohzia inzirtirna huaihawt nise an tih bakah dan lova ruihhlo tawlhrututen danin a phal anga hremna an hmuh theihna turin thuhretua tan pawimawhzia inzirtir uar nise an ti bawk.

Meeting hmasa leh vawiin meeting inkara hmalakna hrang hrangte ngaihthlak niin hmalak leh zel dan turte taka sawiho a ni bawk.