1851/2025-2026

Siaha the 27th August 2025: District AIDS Prevention and Control Committee (DAPCC), Siaha district buatsaihin vawiin khan MADC Golden Jubilee Hall, Council vaih, Siaha-ah District Level Red Ribbon Quiz Competition neih a ni a, Senior Chief Medical Officer Dr. Lalnunziri chuan khuallian niin a hmanpui.

Khuallian chuan intihsiaknaa tel zawng zawngte chungah lawmthu sawiin he inelna an neih tura an inbuatsaihna atanga an thiamna leh hriatnate chu hmang tangkai a, chhungkua, kohhran, leh khawtlangah mi dangte hrilhhretu ni turin a chah. Kalkhawm zirlaite chu Kohhran bel tlat tur leh hmalam hun êng tak an neih tichhetu ni lo turin a sawm bawk.

Dr Lalnunziri chuan ‘Beiseiawm a la nih laiin i fapa chu thunun la’ tih thu chu tuna zirlai duhawm tak tak an ni tiin upa tawh leh ruihhlo leh nun sualin a bawih tawhte chhanchhuah chu thil harsa leh beiseina pawh tlêm deuh tawh anih avangin ruihhlo leh a kaihhnawh tichhin miah lo turin a hrilh a ni. Kum hmasa lamah Siaha district aiawha State Level Quiz competition a telin Mizoram pumah pakhatna an hauh chu lawmawm a tih thu sawiin zirlaite leh zirtirtute chu Mizoram mai bakah regional leh national thlenga lawmman la phak turin a fuih bawk.

Vawiin intihsiaknaah hian school pakhua telin, pakhatna in pawisa fai cheng 7,000/- bakah Citation leh medal an dawng a, pahnihna in pawisa fai cheng 5,000/-, Citation leh Medal dawngin pathumna in Pawisa fai cheng 4,000/-, Citation leh Medal an dawng a ni. School tel zawng zawngin participation lawmman an dawng theuh bawk.

Vawiin District Level Red Ribbon Quiz Competition Result chu hetiang hi a ni:

1) Government Higher Secondary School, Siaha
2) Grace Academy School
3) ECM Higher Secondary School te an ni.

Maraland Academy leh Springfield English School in Consolation lawmman an dawng bawk.

Intihsiakna neih zawh hian Pi Zingia Hlychho, Counselor, ICTC District Hospital, Siaha chuan HIV/AIDS chungchang zirtirna nei chhunzawmin HIV kai theih dan hrang hrang a sawi bakah zirlai naupangte chu nun uluk a, sual dai zawnga nun hmanglo tur leh nupui pasal neih hmaa mipat hmeichhiatna hmang lo tur leh mahni zahawmna leh thianghlimna vawn a tul thu a sawi. Dr. Lalrengpuii Ralte, District AIDS Control Officer (DACO) chuan lawmthu sawiin vawiin hun tihtawp a ni.