548/2022-2023
Siaha; the 19th May,2022: Vawiin chawhnu dar 1:00Pm khan DC conference Room-ah, District Bawrhsap leh District Level SEDP Chairman ni bawk Pu Lalsangliana kaihruaina hnuaiah a vawi-1 na turin District Level Socio-Economic development Policy (SEDP) committee member ten meeting an nei.District dangte Village Level SEDP committee din a, Beneficiaries te an thlan fel tawh laiin,
12th MADC General Election avangin April ni 5 atang khan Siaha district-ah chuan Model Code of Conduct hman a ni a, vawiinah hian a vawi-1 na turin Village Level SEDP din dan tur relin District Level SEDP committee member ten meeting an nei ve thei chauh a ni.

Village Level SEDP committee hi Village Council tina din a ni dawn a. Chairman leh Secretary bakah member 3,5 leh 7 te an awm ang. Chhungkaw 250 aia tlemna VC-ah chuan VL-SEDP committee-ah hian member 3 an awm ang. Chhungkaw 251-500 inkar awmna VC-ah chuan member 5 awmin, Chhungkaw(households) 500 chunglam awmna VC-ah chuan Member 7 an awm thung ang.Member atan hian khawtlanga mi challang thlan tur a ni.

Tahrik 27/5/2022 aia tlai lova Village Level SEDP Committee list te hi DC office-a thehluh vek tur a ni ang.
Family Oriented SEDP hi MLA constituency pakhat-ah a phase 1-na ah chhungkaw 1500 zel thlan tur a ni dawn a.Siaha district tan chuan family 3000 thlan tur a ni ang. 39-Siaha AC hnuaiah 1500 leh 40-AC hnuaiah 1500 thlan tur a ni dawn a ni.

Family oriented SEDP dil theite chu: Mizoram khua leh tui mi tupawh,mahnia eizawnna(Self-employment) kalpui mek emaw hetiang lama bul tan tum leh kuthnathawka ei zawng mek te leh bul tan tumte tan chauh a dil theih ang.

Family Oriented SEDP a nih angin tanpuina hi chhungkua anga dawn tur a ni a, chhungkaw pakhat atangin beneficiary pakhat chauh a awm theih ang. State leh Central sorkar hnuaia hnathawk nghet awmna chhungkua te chu a huam lovang.

Family oriented SEDP thiltum chu: Mahni eizawnna(self-employment leh kuthnathawh) bultan nan leh heng eizawnna kalpui mekten hma an sawn zel nana an hman tur tanpuina pek a, Mizoram chhunga mimal leh chhungkua, a tam thei ang ber dinhmun tha zawka hlan kai
a ni.

Department hrang hrang 9 hnuaia trade hrang hrang thlan tur hi 100 dawn lai a awm a ni.

40-AC Palak MLA constituency hnuaia Village Level SEDP committee din dan tur buaipui turin District Level SEDP Committee member ni lai:
1) Pu S Lalremthang
2)Pu FC Rehmo
3)Pu N.Laihra te ruat an ni a.
39-Siaha MLA Constituency-ah
1)Pu K.Beisa
2)Pu Lianbuanga
3)Pu H. Lalchhinga te ruat an ni a. He team 2 te co-ordinator atan hian Pu N.Vaikhu ruat a ni bawk.

Village Level SEDP Committee din fel a nih hnuah Training pek an ni anga, tichuan Village Level SEDP committee in beneficiaries te an thlang chhuak ang. Beneficiaries list chu District Level SEDP Committee-ah an thehlut ang, District Level SEDP committee in SEDP Executive Board -ah a thehlut ve leh chhawng dawn a ni.