549/2022-2023
Aizawl, the 19th May 2022 : Vawiin khan Planning & Programme Implementation Department in khaw thlan bik 6 a Village Level Development Programme kalpui nana an din State Level Coordination Committee chu Planning & Programme Implementation Department Conference Hall ah an thukhawm.

Hmasawnna hna hrang hrang, a khaw mipuite rawn chunga kalpui decentralized planning en chhin nan he Pilot Project hi Planning & Programme Implementation Department in 2019 khan an duang a, mahse hripui a len tak avangin kum 2 chuang hma a lak theih lova, tunah hripui a kiam taka hma lak tumin he inrawnkhawmna hi neih a ni. District 6 a khaw 6 – Aizawl District ah Sailam; Champhai District ah Chawngtlai; Kolasib District ah Lungdai; Lunglei District ah Sekhum; Mamit District ah Ailawng leh Serchhip District ah Leng te chu SIRD&PR in thlang chhuakin Entry Point Activity (EPA) te chu mipui rawn chungin tihfel leh thlan niin Development Plan te duan a ni. Khaw tin tan nuai 10 dah niin heng hi Entry Point Activity tana hman tura ruahman a ni.

Meeting ah hian khaw tin tana Development Plan siam leh Entry Point Activity thlan te chu sawiho niin henga Line Department te mawhphurhna leh an tih tur te sawilan a nih bakah EPA te endik chungchang pawh sawiho a ni a. EPA te hi tun thla tawp lamah tan beisei a ni.

VLDP in a tum ber chu decentralized planning enchhin a, hmasawnna hna te chu mipui mamawhna leh duh ang ngei a kalpui bakah eizawnna ngelnghet an neih nana kawng hrang hranga ruahman awmsa te tihphuisui leh tihchak a ni.

Meeting ah hian Line Department hrang hrang aiawh te an an tel a ni.