756/2025-2026

9th June 2025: June Ni 11, 2025 a Green Mizoram Day lawm dan tur relin ni 6 chawhnu khan DC Mini Conference Hall, Siaha-ah District Bawrhsap Pu VL Hruaizela Khiangte, District Level Sub-Committee on Green Mizoram Day Chairman nibawk kaihhruaiin thutkhawmna neih a ni.

District Bawrhsap Pu VL Hruaizela Khiangte chuan kumtinin Green Mizoram Day chu hman thin niin thing tiak phun thin a ni a, a enkawl zui kawngah nasa lehzuala tan lak a ngai a ti. Kuminah pawh thing phun leh tur a ni a, a phunna tur hmun thlan fimkhur a tul hle a, lei min thei bakah kawng laih zauh leh a dangtein a tihchhiat mai theih lohna tur leh awmze neia thing phun a nih theih nan site selection thlan fimkhur a pawimawh hle a ti a ni.

Thutkhawm ah hian Green Mizoram Day 2025 chu MADC Forest Hall-ah June Ni 11 ah hman nise tih an rel a, zing dar 7 ah hawnna hun hman a ni anga, a ni vek hian Mizoram sawrkar leh MADC department hrang hrangin thingphunna an nei chhunzawm nghal dawn a ni. Hemi hawnna programme-a Khuallian atan MADC CEM Pu M Laikaw sawm nise an ti a, Hun kaihruaitu atan Addl DC Pu Abraham Beirazi Khithie sawm nise an ti bawk. Thing tiak phun tur ngaihtuah turin MADC Forest Department ruat an ni a, kang mei chhuak tur laka venhim kawnga thawk tha VC thlan an ni leh dawn bawk a ni. Vawiin meeting chuan kum dang zawng aiin thing phun sa enkawl kawngah tan lak ni se an ti a, inelna thianghlim a awm theih nan tha taka an thing phunte enkawl a, chhawm nung department-te chu a kum leh Green Mizoram Day ah lawmman pek nise tih an rel bawk a ni.