1768/2025-2026

Siaha the 7th October 2025: District Task Force for National Immunisation Day, Siaha chuan vawiin khan DC Mini Conference Hall, Siaha-ah Addl DC Pu Abraham Beirazi Khithie kaihhruaiin an thukhawm.

Addl DC Pu Abraham Beirazi Khithie chuan vawiin thutkhawm chu a pawimawh hlea hriat thu a sawi a, Siaha District-ah naupang kum khat hnuai lam thihna (Infant Mortality Rate) a sang hle chu veiawm a tih thu tarlangin vaccine lak that a pawimawh thu a sawi a ni. DTFI Member Secretary leh Chief Medical Officer (CMO) Dr Lalrengpuii Ralte chu NID hmalakna leh hriattur awm te sawizauna nei turin a sawm nghal.

 Dr Lalrengpuii Ralte chuan thutkhawm chhan chu zeng hri (pulse polio) chungchang a ni a ti a, India ram chu kum 2014 khan zeng hri awmlohna (polio free) a puan ni tawh mahse ram thenawmah zeng hri a la tam a, inkaichhawn theihna a la sang hle tiin a hun taka zeng hri danna lak a pawimawh hle a ti. Mizoram bikah Siaha, Lawngtlai, Champhai leh Lunglei chu he programme kalpui tura thlan an nih thu a tarlang bawk.

October Ni 14 atangin District chhunga naupang kum 5 hnuai lam (target beneficiaries) te hnenah zeng hri laka invennan Oral Polio Vaccine (OPV) pek runpui neih a ni dawn a ti a, heng zingah raltlan tam tak pawh an tel a ti bawk. He zeng hri danna pek kawngah hian Khawtlang mipuite, Department hrang hrangte leh VC te thawhpuina a ngen a, a hun taka invenna lak a pawimawh zia tlangaupui turin a ngen a ni.

CMO chuan Siaha District a Fully Immunized rate chu 78% chauh a ni a ti a, heng avang hian Mizoram pumah natna tam tak hluar berna a ni tiin naupang vaccine pek kawngah nu leh pate than harh a tul hle a ti bawk a ni.

Vawiin thutkhawmah hian tanrual a pawimawh thu tarlan a ni a, Damdawi in ngeia nau neih ( institutionalised delivery) ngaih pawimawh a tul thu te, hri hrang hrang laka invennana vaccine lak kim a tul thu te sawiho niin Sawrkar chuan theihtawp chhuah thin mahse a hlawhtlinna tak tak chu mipui kutah a awm a, mipui hrilhhriat a pawimawh thu te sawiho a ni.